Derby-in Steve McClaren an ban
Championship club Derby County chuan an manager Steve McClaren chu a vawi hnih nan an ban! English manager hian September 2013 khan Derby hi a vawi khat nan kum hnih leh a chanve chhung cham turin a lo zawm tawh a, May 2015 khan a contract tihtawp sak a ni.
October 2016 khan McClaren hi Derby hian an manager ni turin a vawi hnih nan an ruai leh a, mah se Championship match 26-ah vawi 12 chiah hnehna changa vawi riat a tlawmpui hnuah ban a ni leh ta a ni. Derby hian an league match hnuhnung pakuaah vawi khat chiah hnehna an chang!
Rams (Derby sawina) chairman Mel Morris chuan, "Kan club kalphung hrethiam a, he club hmasawn pui thei tur manager kan mamawh a ni," tiin McClaren an ban chhan a sawi a, reiloteah manager thar an puan thuai a beisei thu a sawi.
Derby hian tun hnaiah manager an thlak ngun hle a, May 2015-a McClaren an ban hmasak khan tuna Swansea boss Paul Clement an lalut a, February 2016 thleng bak a daih lo. Clement aiawh tur hian Darren Wassall an lalut a, May 2016-ah chhuahtirin Nigel Pearson an lalut. Leicester boss hlui nen inhriatthiam tawnnaa an inṭhen hnuah McClaren an lalut leh a, thla nga bak a daih leh chuang lo.