Real Madrid tan champion a hnai
Spanish La Liga champion thar kan hriat nan Real Madrid-in match hnih an khelh chiah a ngai tawh. Zirtawpni zan khan Real hian 2-0 in Alaves an hneh a, match thum khelh tur la awmah vawi hnih an chak chuan an champion ang.
Real tan Karim Benzema leh Marco Asensio ten goal khat ve ve an khung a, tlak hlau Alaves-in a chhanletna tur an neih loh avangin Zinedine Zidane leh a naute tan lawmna ni a hnai ta sawt tihna a ni.
Barcelona-in Inrinni zanah thai bo mai theih an la ni bik lo tih pholangin Real Valladolid chu 1-0 in an hneh a, inkhela goal awmchhun hi Arturo Vidal-a'n a khung. Catalan club hian match khata khel tam chungin Real hi point khatin an phak lo mek a, zanin dar 1:30-a Granada lenchilh tur Madrid khaw club-in hnehna an chan chuan point liin an tlansan lehnghal ang.
Real an hlauthawng
Tla thei dinhmuna ding mek Alaves-in coach Asier Garitano an ban hnuah manager thar Juan Lopez Muniz hnuaia an match hmasa ber an khel a, inkhel ṭantir lamah mualneitu Real an hlauthawng hman hle. Newcastle United striker hlui Joselu chuan crossbar a rawn tauh per dawp a, a let leh lam hi Arsenal striker hlui Lucas Perez chuan lo dawng fuhin a pet zui - Raphael Varane-a'n line aṭangin a lo pet chhuak hman a, Real an vannei takzet.
Mahse, minute 11-naah Real thin phu nasa lutuk tih ziaawm nan Karim Benzema chuan penalty aṭangin goal hmahruai a khung a, French striker-in tun season La Liga-a goal 18-a khungna chiah a ni. Alaves an beidawng duh bik lo - Real lakah chak tumin an khel ngam a, West Brom aṭanga loan hmanga an hawh winger Oliver Burke che vel chu hmuhnawm a tling. Mahse, Scotland international vanneih zan a ni lo a, Thibaut Courtois a paltlang thei lo.
A chiang ta
Real-in duhtawk an tum lo. Second half ṭan aṭanga minute nganaah Marco Asensio chuan an goal hnihna a rawn khung a, hliam vanga a chawlh reng hnuah Asensio hian league match ruk khelin goal hnih a khung fel der ta. Asensio goal khung hi Benzema offside vangin a tirah pawm ni lo mah se VAR rawn a ni a, endik a nih hnuah French striker hi a offside lo tih official lamin pawmin goal-ah an pawmsak.
Alaves-in Joselu hmangin Courtois rum ṭhaih ve leh bawk mah se Belgian goalkeeper chet ṭhat vanglai a nih avangin paltlang an harsat a, Real an him. Real tan hian Rodrygo leh Benzema te pawhin chance duhawm an nei ve leh tho a, mahse Alaves tana si ban nghaktu, West Ham goalkeeper hlui Roberto an paltlang thei bik lo.
Suarez tel lohna
Barcelona boss Quique Setien chuan rin loh takin striker chhuanvawr Luis Suarez chu Real Valladolid lakah bench-ah a dah a, kum 20 mi midfielder Riqui Puig chuan inkhel bul a ṭan thung. Suarez tel loh Barcelona tlarhma goal nawr a na tawk lo a, hetihrual hian minute 15-naah vanneihna an chhar tiin a sawi theih - Arturo Vidal chuan Lionel Messi siamsak chu goal-ah a chantir.
Valladolid-in chance nei ve ṭhin mahse Barca keeper Marc-Andre ter Stegen an paltlang hleithei lo a, an finishing ṭhat tawk loh chu an tuar tiin a sawi theih bawk. Barca-in hun tawp thlengin goal dang an khung lo a, Vidal-a goal khat chu chak nan an hmang. Barca-in hnehna chang mah se match hnih chauh khelh tur an neih tawh avangin champion beiseina a tlem ta hle.
Messi a bo
Valladolid lakah Barcelona-in inkhel an thunun a, ball pawh an chang tam - mahse an khel rei tawlh tawlh a, an talbuai tawlh tawlh a, Messi hmuh tur a tlem hle. Mahse, player thiam bik danglamna chu an khelh ṭhat loh ṭum pawha ngaihven an hlawh ṭhin hi a ni a, khelh ṭhat loh zana record siam thei player hi an tam lo.
Messi erawhin a khelh ṭhat loh zanah pawh a ṭhiante khung tur a siamsak a, tun season La Liga-ah vawi 20 assist a neihna niin league match 31-ah goal 22 a khung tawh bawk - La Liga season khata goal leh assist vawi 20 aia tam nei thei hmasa ber a ni. Argentine striker hi kum 2008-09 hnua La Liga-a vawi 20 assist nei leh thei hmasa ber a ni bawk a, Barcelona tana a khelhpui ṭhin Xavi-a'n 2008-09 season khan vawi 20 assist a lo nei tawh a ni.
July 10, Zirtawpni Zan
Real Sociedad 2 - 3 Granada
RES: Mikel Merino 47'; Mikel Oyarzabal 83
GRA: Antonio Puertas 21'; Roberto Soldado 43';
Domingos Duarte 88'
Real Madrid 2 - 0 Deportivo Alavés
REM: Karim Benzema 11' (P); Marco Asensio 50'
July 11, Inrinni Zan
Osasuna 2 - 1 Celta Vigo
OSA: Enric Gallego 23'; José Arnáiz 90'+1
CEV: Santi Mina 10'
Real Valladolid 0 - 1 Barcelona
BAR: Arturo Vidal 15'
Atletico Madrid 1 - 0 Real Betis
ATM: Diego Costa 74'
Zanin Inkhel Tur
Deportivo Alavés 11:00 PM Getafe
Villarreal 11:00 PM Real Sociedad
Granada 01:30 AM Real Madrid