Grand Slam khelh tum Murray

Andy Murray chuan season hman hma bakah Grand Slam pahnih US Open leh French Open te chu khelh a chak thu a sawi a, eng inelna te nge a hmachhawn dawn tih erawh a la thlang fel mai thei rih lo.

Britain tlangval hi tun hnai season thum vel chu hliam hrang hrang vangin a buai hle, tennis chawlhsan pawh a tum hman hial. Mahse zawi muangin a dam chho leh tawh a, tun hnai thla riat chhunga a vawi khat nan tun kar tawp hian an ramah British exhibition khelh a tum.

Grand Slam vawi thum champion tawh Murray chuan, "Grand Slam khelh leh chu ka thil tum lian ber a ni. Season kal lai hi hriatthiam a har a, khelh hmabak kan la neih hmachhawn tur pawhin insiamrem thiam chu a ngai dawn," a ti.

August 31 aṭang hian New York khawpuiah US Open khelh a ni dawn a, September thla chawhnu lamah French Open chu Paris-ah an khel chhunzawm leh nghal ang. Clay court inelna lian hi May thlaa khelh tur kha ni mah se Covid-19 vangin inelna neih hun hi an sawn.

World number 1 hlui chuan a dinhmun chungchang sawi zuiin, "March thla vela ka dinhmun nena khaikhin chuan tunah hian ka ṭha zawk hle. Tun hnai kar li chhung vel chu ka khel bawr na pawh hre loin ka training thei.

"Ka insawizawi hnem a, inbuatsaih nan match tenau ka khel nual bawk. Tun hma anga duhthusam ang kha ni vek lo mah ila beiseina sang tak nen tennis ka khelh leh theih hi chu ka la ring reng," tiin hliam vanga buaina karah beiseina a la nei.

Coronavirus vangin March thla aṭang khan ATP leh WTA hnuaia inelna zawng zawng an chawl lailawk vek. August 14 aṭang hian mipa inelna Citi Open chu Washington-ah khelh an tum - US Open inbuatsaihna a ni 

nghal ang.