Messi vanga chawlh tum hman Boateng!

Barcelona tana 2018-19 season chawhnu lam lo khel tawh Kevin-Prince Boateng chuan Lionel Messi nena an training dun chuan football chawlhsan duh maina rilru a pek hman hial thu a sawi!

January 2019-a Barca zawmtu forward chuan, "Messi nena kan training dun meuh kha chuan, ka career-a a vawi khat nan football khel tura tling tawk lo ang hialah ka inngai a ni. 'Kei chu chawlh mai ka duh,' tia sawi mai kha ka châk hial. 

"Cristiano Ronaldo hi footballer ṭha ber a ni tiin ka sawi fo ṭhin a, mahse Messi zawng thil dang daih a ni a, mi pangngai ang a ni ve lo," a ti. 

Serie B club Monza tana khel Boateng-a'n Messi fak viau mah se tun season-ah erawh Argentine forward hian eng a ang lo a, inelna hrang hrangah match 11 khelin goal ruk chiah a la khung - Pathianni zan dar 6:30-ah La Liga match khel turin Osasuna an mikhual ang.