Mourinho nauten Conte hote an ngam lo ; Chelsea 1 - 0 Man United

FA Cup champion lai Man­ches­ter United chu Stamford Bridge-ah Chelsea-in chaih phar a, Antonio Conte hoten N'Golo Kante goal hmangin semifinal an lut.

Kante hian minute 51-ah goal awm chhun a thun a, minute 35-na leka Ander Herre­ra hnawh chhuah chu Man United-in an tuar.

Premier League-ah Blues-in anmahni hnaih bertu Tottenham Hotspur aiin point 10-in an hmu tam. Spurs bawk hi FA Cup semifinal-a Chelsea hmachhawn tur an ni a, Italian manager hian English club a enkawl hmasak bera nomawi pahnih chawi turin a dinhmun a ṭha ta hle.

Striker buaina
United-in hrem vangin Zlatan Ibrahimovic an chhawr thei lo a, damlo pathum Wayne Rooney, Anthony Mar­tial leh Marcos Rashford zinga a naupang ber kum 19-a upa English forward chu dam chiang lo chunga khelh luihtir a ni.

Mourinho tana harsatna belh­chhah turin Herre­ra chu minute 35-naah hnawh­chhuah a ni a, hei vang hian goal nawr thiam Henrikh Mkhitaryan aiah goal venhim kawnga ṭang­kai Marouane Fellaini a luhtir a ni.

Bus an park e
Stamford Bridge-ah Mou­rinho kaihhruai an len­luh hmasak berin 0-4 in an mualpho a, United-in FA Cup quarterfinal-ah chetsual nawn tum loin tlarhnung venhim hna an thawk.

Herrera hnawhchhuah a nih hnuah phei chuan Rashford hnaih bertu United midfielder pawhin an striker hi ball pe turin long ball an vawrh a ngai a, hei hian Chelsea-in inkhel an thunun tih a tilang chiang hle.

Kante a te lo
Kante hi feet nga leh inches sarih pawh tling pha lo a ni a, Lei­cester City-in league no­mawi an chawi ṭumin French midfielder ball chhuhsak thiam zia leh taihmak zia khawvelin a hre tawh.

Kum 25-a upa Kante hian pound maktaduai 30 velin Chelsea a zawm a, Manchester United nen an khelh ṭumin amah aia let thum dawna manto zawk Paul Pogba aiin a let tamin a khel ṭha zawk.

Kante hmaah feet ruk leh inches thuma sang Pogba ding mah se minute 51-naah Chelsea midfielder hian box pawn aṭangin a pet goal. United-in goal an chhuah chhanah khawvel player manto ber hi mawhphurhtu lian ber a ni.

Goal khung lai tak hi Kante ṭhat tawk lohna tiha sawi a ni a, United erawhin goal khung thei tihin an hria ang. Blues midfielder hian Chelsea tana a goal khung pahnih hi Red Devils lama a khung a ni.

Hazard leh red card
Chelsea tan Eden Hazard a pawimawh tih hrechiangtu chu Jose Mourinho a ni a, Portuguese manager hian naute chu Belgian winger veng uluk turin a hrilh.

Spanish midfielder Herrera chuan Hazard a tihtluk vangin a vanduai a, minute 20-naah yellow card a hmu nghal. United-in Hazard laka vawi thum an foul hnuah referee Michael Oliver-a'n Red Devils player-te chu Belgian winger chunga fimkhur turin a hrilh a; amaherawhchu Herrera-a'n khelmual chhunga thu ber zilhna pawm loin minute 35-naah Hazard titlu nawn sakin Spanish midfielder-in vawi hnih lek a foul-naah red card a hmu nghal.

Fak phu Conte
Conte nau­ten awmze neiin an khel a, inrintawkna an neih bawk avangin United-in kawng engkimah an chelh lo.

Blues hi Red Devils lakah vawi khat chiah an chesual. Second half-ah David Luiz-a'n ball a pet ṭhelh avangin Rashford-a'n chak takin ball la lutin harsatna nei loin Gary Cahill a bum leh a, amaherawhchu kee­per Thibaut Courtois-a'n English forward ball pet hi a dang.

Chelsea laminan inhlah siak a, United player tam zawkin goal venhim hna an thawk chung pawhin David de Gea tan hna an siamsak hnem hle. Italian manager hian a player-te field sir aṭangin a au phur reng a, United-in awmze neia ball an inpek loh nan pressure an pe ṭha a, an khingpuiten an nawr chhunah pawh a aia nain an nawr let zel avangin player 10-a khel Mourinho naute an che thei lo.

Eng nge an sawi?
Chelsea manager Conte chuan, "United hi lea­gue-a player nei ṭha ber an ni a, heti chunga ṭha taka kan khelh theih avangin kan khelh dan hi a chhuan tham hle. Kan lawmna ber zawk erawh semifinal kan lut hi a ni," tiin a sawi.

Red card chungchang sawi­in, "Ha­zard-a'n inkhel bul ṭan mah se a inkhel ve thei lo. A chunga thil thleng zawng zawng kha thlir ula, chumi zawh chuan thutlukna insiam chauh dawn nia," tiin thiam takin referee thutlukna a fak.

Chelsea manager hlui Jose Mourinho chuan, "Red card chungchang sawi thui ka duh lo a, ka sawi duh chu ka player-te leh United fan-te ka chhuang hle tih hi a ni. Kan hahdam phawt ang a, Ningani zana Europa League khel turin a ṭha thei ang berin kan inpuahchah ang," tiin a sawi.

Inkhel thlirin United boss Mourinho chuan, "Mi zawng zawngin kan duh lai la chhuakin inkhel zir bikna kan nei thei a, chutihrualin kan vaia kan hmuh tur erawh red card hma leh red card hnua inkhel awm dan kha a ni. Chutia a nih chuan yellow card pahnih leh foul ṭhenkhat card a pek lohnate kha kan khaikhin thei ang. Amaherawhchu he ti zawnga sawi thui ka duh lo. Michael Oliver hi referee theih­na sang tak nei a ni a, mahse match hnuhnung paliah penalty pathum a pek bakah red card pakhat a phawrh bawk. Hei chu ka thlak theih loh thil a ni a, hei vang hian ka chibai pahin ka lawmpui thu ka hrilh," tiin a lungawi lo.

Behbawm
Chelsea hian United nena an match hnuhnung 12-ah chak loh an nei lo a (W7 D5), an chak loh hnuhnun ber chu October 2012 daih tawh kha a ni.

An intawn hnuhnun berah pawh hian United hian 28% chiah ball possession an nei a, tun season-a an ball chan tlem ber a nih avangin chak phu khawpin an khel chhuak lo tih a chiang hle.

Blues hian FA Cup semifinal vawi 22 an thlenna a ni thung a, an tluk loh panga chu Arsenal 29, Man Utd 28, Everton 26, Liverpool 24 te chiah an ni.