2015 Santosh Trophy semifinal rematch Mizoram vs Punjab

Vawiin tlai dar 4:00 hian Mi­zo­ramin Tilak Maidan, Goa-ah Punjab an hmachhawn dawn. Football thiam state pahnih hi 2015 Santosh Trophy semifinal-ah intawng tawhin hemi ṭum hian inelna thlengtu Punjab chu penalty shootout-ah an vannei zawk.

Punjab chu

Punjab hian nikum khan Mizo­ram ang thoin final round thleng mah se semifinal an thleng zo lo. Kuminah vawi riat champion tawh Punjab hian final round lut turin Uttarakhand (3-0), Haryana (1-0) leh Jammu and Kashmir (1-0) te an hneh a, goal an chhuah lo.

Final Round-a an match hmasa berah Punjab hian Manvir Singh leh Rajbir Singh-te goal hmangin Railways chu 2-1 in vawiina an inkhelhna tur khelmual Tilak Maidan-ah an hneh.

Punjab hian inkhelhna hmun hi Mizoram aiin an hre bel dawn a, an striker Rajbir ven uluk a ṭul bawk. JCT Academy chhuak striker Ranbir hi Railways tlarhnung rumṭhaihtu ber a ni a, qualifier-ah goal hnih a khung bawk.

Mizoram lam

Mizoramin an match hmasa ber­ah nikuma an hneh loh Maha­rashtra chu inkhel thunun chung­­in 3-1 in an hneh a, hemi ṭum hian goal hmahruai khungtu V.Lalchhuanawma leh under 21 player K. Lalmalsawma chu inhliam vangin lakchhuah an ni.

ONGC player Chhuantea leh BVT defender Malsawma te hian training an zawm leh tawh a, coach Lalsangzuala Hmar-in Punjab hmachhawn tura a duh a nih chuan a chhawr thei ang.

Forward Lalrammuanpuia erawh damlohna vangin khelmual chhungah 100% in a la inlan thei lo a, mit na vangin keeper H. Lalremruata nen an inlan theih a rinawm lo.

Mizoram tana thu lawmawm chu defender Lalhmunmawia'n training a zawm leh tawh a; Police defender Ahmuntea hi under 21 player a nih avangin coach Sanga tan thu lawmawm a ni.

Eng nge an sawi?

Mizoram manager Lalthanzama Vanchhawng chuan, "Tilak Maidan-ah hian Punjab an khel tawh a, kei ni erawh kan vawi khat khelhna tur a nih avangin a harsa hret ang. GMC, Bambolin pawh kha ground ṭha tak ni mah se insiamrem turin minute 20 dawn lai kan mamawh a ni. Khualmuala khel ni mah ila Mizo awmte aṭangin ṭawiawmna ṭha kan hmu a, Goa-a Mizote hian Punjab nen pawh min ṭawiawm ṭha leh ang," tiin Vanglaini palai a hrilh.

Mizoram coach Lalsangzuala Hmar chuan, "Player zingah in­hliam tenau nei an awm nual a, hei vang hian duhthusam thlap chuan player kan rem thei lo ang. Chutihrualin tu­pawh inlan se ka player-te ka ringtawk a, theihtawp kan chhuah leh ang a, hnehna kan chan ngei ka beisei," tiin a naute a rintawk thu a sawi.

Vawiin hian Group B inkhel dangah Railways leh Kerala te GMC, Bambolin-ah an inhma­chhawn dawn a, Kerala hi an vawi khat inlanna tur a ni.