India team-in training nei
AFC Asian Cup UAE 2019 qualifier khel tura inbuatsaih mek India chuan Thawhṭanni khan Andheri Sports Complex, Mumbai-ah training an nei ṭan a, nizana AFC Cup khel Mohun Bagan leh Bengaluru player-ten training an la zawm ve theih loh avangin players awm zat hi 15 an ni.
India coach Stephen Constantine chuan probable squad-ah players 31 ko hmasa zet mah se tun hnaiah Bengaluru goalkeeper Arindam Bhattacharya a ko leh bawk a, Mumbai-a training session an neih zawhah squad dik tak puan a ni leh dawn. India squad-ah hian Mizo pali Mohun Bagan striker Jeje Lalpekhlua, Bengaluru FC striker Daniel Lalhlimpuia, Shillong Lajong midfielder Isaac Vanmalsawma leh DSK Shivajians left back Jerry Lalrinzuala te chu koh zingah an tel.
A players thlan dan avanga sawisel hlawh tak India coach Constantine chuan, "India team hi he ram pumpui football hmel lanna a ni a, tun dinhmunah chuan kan ram tan hna kan thawk ṭha thawkhat viauah ka ngai a ni. Mahse, kan hmabakah hnathawh tur tam takin min la hmuak a, kan tum hmasak ber tur chu AFC Asian Cup UAE 2019 khel tura inpet kai hi a ni ang," a ti.
India hian March 22 khian Cambodia chu Phnom Penh khawpuiah friendly match an khelhpui dawn a, AFC Asian Cup Qualifier khel turin March 28-ah Myanmar an hmachhawn leh ang.