Ramhlun South inlan dawn

Aizawl DFA leh TṬ Royte Group ṭangkawpin NECS Cup vawi li an buatsaih tawh a, Ramhlun South hian vawi thum final lutin vawi hnih an champion. Nomawi vawi hnih chawi thei hmasa ber hian vawiin chawhma dar 11:00 hian Lammualah Venghlui nen quarterfinal an khel ang. Veng pahnih hian Aizawl DFA hnuaiah first division club an nei ve ve a, ṭha zawka tiha sawi tur an awm lo.

Ramhlun South hi MPL5-a Chanmari West coach HC Zarzoliana'n a enkawl a, veteran mid­fielder Samson Rameng­mawia leh Ramhlun North FC winger Vanlal­thlamuana ten an ho thei a, amaherawhchu Chennai City tana khel Malsawmfela lel Lalnun­mawia bakah DSK Shiva­jians forward Lalawmpuia te an awm loh avangin an ṭhat dan berin an inlan dawn lo. Venghlui tan vawiin hi sulhnu nei ṭha veng hneh theihna hun ṭha a ni.

Chawhnu dar 1:00-ah Armed Veng pet chhuaktu Republic Veng chuan Armed Veng South an hmachhawn ve leh ang. Kum 2004 Inter Village semifinal leh 2005 CYMA Football final-ah Republic Veng hian Armed Veng South hi an lo hneh tawh a, nomawi an chawi zui bawk avangin inchhuanna tham a tling. Kumina an player en erawh chuan Kelsih leh Chanmari hnehtu Armed Veng South hi team ṭha zawk an ni.

Armed Veng South leh Republic Veng te hi veng lian ve ve an ni a, tlai ni nemah an khelh dawn bawk avangin inkhel entu an tam dawn. Entu mipui lam pawhin ṭhutna ruahhman dan an zawm a ṭul ang.

Vawiin inkhelah hian Venghlui leh Republic Veng ṭantute K. Kawla Stand-ah ṭhut tur a ni a, Ramhlun South leh Armed Veng South ṭantute Zomuanthanga Stand-ah an ṭhu thung ang. Kumin NECS Cup quarterfinal hi group pahnihah ṭhen hran an ni a, group khata awmte an inkhelh kual hnuah a sang pahnihin semifinal an lut ang.

GROUP A
Vawiin Inkhel Tur
11:00 AM Venghlui Vs Ramhlun South
01:00 PM Republic Veng Vs Armed Veng South
GROUP B
March 16, Ningani
11:00 AM Luangmual Vs Chhinga Veng
01:00 PM Zemabawk North Vs Electric Veng
March 17, Zirtawpni
11:00 AM Chawnpui Vs Bawngkawn
01:00 PM Sihphur Venghlun Vs Bethlehem