FA Cup semifinal hmuhnawm dawn
Khawvel football inelna upa ber FA Cup semifinal-ah club lian pali Arsenal, Chelsea, Manchester City leh Tottenham Hotspurs te an lut a, eng team pawh inhmachhawn se sawi hlawh vek tur a ni.
Thawhṭanni zan khan tie draw neih a ni a, Chelsea leh Tottenham Hotspurs te chu pawh fuh niin semifinal pakhat zawkah Arsenal leh Manchester City an inkhel bawk ang. Semifinal hi Wembley Stadium-ah April 22-23 khian khelh a ni ang.
Arsenal hian 2014 leh 2015 khan FA Cup nomawi hi an chawi a, semifinal lut tur hian non-league club Lincoln City chu 5-0 in an sawp. Gunners manager Arsene Wenger-a'n tun hnaiah duh lohtu ngah mah se London club hian vawi 29 nan FA Cup semifinal an thleng a, FA Cup semifinal record an siam theih chhan hi French manager vang liau liau a ni.
Gunners khingpui tur Manchester City hi league-a an chet ṭhat dan en chuan London club aiin an chungnung hret a, manager ropui pahnih Pep Guardiola leh Wenger inhmachhawn tur hi a ngaihnawm ang.
Chelsea leh Tottenham hi London club ve ve an nih avangin boruak a awm nghal a, Blues midfielder hlui Frank Lampard chuan, "Tun hnaiah team pahnih hi an che ṭha em em a, chutirhualin final lut turin Chelsea hi an dinhmun a ṭha hretin ka hria," tiin a sawi.