Kerber chak hram

World number 1 nih leh tur Angelique Kerber chuan Thawhṭanni zan khan Pauline Parmentier chu 7-5, 3-6, 7-5 a hnehin BNP Paribas Open last 16 a lut. Indian Wells-ah hian world number 2 Kerber hi vawi kua a inlan tawh a, kum 2012 leh 2013 khan semifinal a lut, a la champion lo thung.

Kumin Australian Open khelh zawh aṭang­in Kerber hian Serena Williams lakah world number 1 nihna a hloh a, American star Serena hi a khup na vangin tun ṭumah hian a inlan lo a, Miami Open a khelh theih loh zui dawn bawk avangin Kerber hi number 1 a ni leh dawn.

Inkhel dangah 2015 champion Simona Halep chu seeded 28-na Kristina Mladenovic lakah 6-3, 6-3 in a chak lo. Madison Keys-i'n Naomi Osaka chu darkar khat pawh tling loah 6-1, 6-4 in a hneh a; Venus Williams, Elena Vesnina leh Lauren Davis te pawhin hnehna an chang ve bawk.