Sharapova wildcard pek dan sawiseltu Wozniacki

Damdawi hman phal loh a hman avanga in­khel thei lo mek Maria Sha­rapova chu April 26 aṭang­in a inkhel thei leh tawh dawn a, Stuttgart Open bakah Madrid leh Rome te chuan wildcard an pek tur thu an ti chiang tawh.

Wildcard hi player ngaih­ven hlawh leh thleng sang thei tura beisei, a bik takin inelna an buatsaihna hmuna hnuhma lo nei ṭha tawh leh mipuite ngaihven bik, an ranking a hniam vanga direct a inlan thei si lo te hnenah pek ṭhin a ni.

Russian star hi a lo kir hunah ranking a nei dawn lo a, player ṭhenkhat dang ang chu nise tournament a khelh turah hian quali­fying a khelh a ngai ngei ang.

World number 1 hlui Caroline Wozniacki chuan, "Dan leh hrai hi tihdanglam theih a ni tih chu ka chiang. Player-in dan a bawhchhia a nih chuan hunṭha pek leh chu a phu ngei mai. Mahse, ka ngaihdan chuan a hniam ber aṭangin bul a ṭan ve leh tur a ni. Stuttgart Open bik phei hi chuan player dangte min zah lo a ang hial zawk," a ti.

Grand Slam vawi nga champion tawh Sharapova hi April 26-ah a lo kir dawn a, Stuttgart Open hi April 24 aṭanga khelh tur niin Russian star hi tournament tir lam­ah chuan hrem a la ni dawn. Mahse, wildcard hmanga inlan tur a nih avang­in qualifying a khelh a ngai dawn lo - hei vang hian a match hmasa ber a khelh hun tur a thlen hunah hremna hi a zo hman dawn a ni.

Kum 26-a upa Wozniacki leh Sharapova te hi vawi 10 an in­hma­chhawn tawh a, Shara­pova hian vawi ruk hneh­na a chang tawh.