Dinthar aia lian Ramhlun North

NECS Cup 2017 last 16 match hmasa berah Thingsulthliah-in Chite 3-1 in an hneh a, nimin Lam­mual inkhel hnuhnung zawkah Ramhlun North-in quarterfinal lut turin Dinthar 2-1 in an hneh ve bawk.

Mizoram Premier Lea­gue club nei veng pahnih inkhelah Ramhlun North tan Lalhunruata'n first half tawp hma hreta a khung chu Dinthar lamin Samuel Laltlanthanga hmangin second half ṭantirhah an sut. Hun pangngaiah goal dang a luh belh lo a, MPL5-a vawi khat ve ve an chak a, tunah an inhnehtawk leh takah chuan Ramhlun North-in football-ah nasa takin hma a an sawn tih a lang.

Extra time khelh a ni a, second half-ah Lalruatdika'n minute 114-naah Ramhlun North chakna goal a khung. Phulpui leh Chanmari West pet chhuaktu Ramhlun North hian an match hmasa pahnihah hian goal an chhuah lo a, Dinthar forward Samuel-a laka an goal chhuah hi tun inelnaa an goal chhuahna hmasa ber a ni.

Kuminah Dinthar hian beisei an phak lo, an match hmasa berah Salem chu penalty shootout-ah an hneh hram a, match hnihnaah K. Ramdinthara goal hmangin Ramhlun Vengthar hneh mah se Ramhlun North lakah tualchhung football a tawnhriat nei ṭha Samuel bakin goal a khung theih loh avangin an zinkawng a tawp.

Inkhel dangah Aizawl khawpui pawn team ṭha Thingsulthliah chuan Joel Lalmuanpuia goal hnih leh Henry Zorempuia goal hmangin Chite Veng 3-1 in an hneh. MPL5 U18-a BVT striker Joel-a hian an match hmasa pahniha Sakawrdai leh Tuikual North an hneh ṭumin goal a lo khung tawh bawk.

Thingsulthliah rawlthar Joel hian MPL5 U18-ah khan goal ruk khungin BVT a champion pui a, best forward atan thlan a ni bawk.ṭNimin Inkhel Results

Chite Veng 1 - 3 Thingsulthliah
CHI : Lalbiakdika 57'
THI : Joel Lalmuanpuia 9', 89'; Henry Zorempuia 45+2'
Dinthar 1 - 2 Ramhlun North
DIN : Samuel Laltlanthanga 52'
RHN : Lalhunruata 45'; Lalruatdika 114'