Kum 50-a goal khungtu Miura

Japanese forward Kazuyoshi Miura chu kum 50-a upa nichunga Japanese league-a goal khung thei hmasa ber a ni. Yokohoma FC striker Miura hian J-League Division 2 inkhela 1-0 a Thespa an hnehna inkhelah goal awmchhun hi a khung a, nikuma J-League a goal khung thei upa ber record ama lo siam tawh chu a khum leh ta a ni.

January thlaa Yoko­homa tana contract thar ziaktu striker chuan, "Goal khung hi nuam ka ti takzet a, hmasawn zel hi ka duh a ni," a ti a, Yokohoma hi kum 2005 khan zawmin hetihlai hian kum 38-a upa a ni tawh.

Japan tan match 89-a inlana goal 55 khung tawh striker hian Brazilian club ṭha Santos aṭanga a career ṭanin kum 1986 khan a professional match hmasa ber a khel a, Italian club Genoa leh Croatian club lar Dinamo Zagreb tan a lo khel tawh bawk.

Football khawvela thu­neitu sang ber FIFA chuan Miura hi pro­fessional football-a goal khung thei upa ber a nih leh nih loh an tichiang thei lo a, international football-a goal khung upa ber chhinchhiah chu Billy Meredith niin kum 1919 khan kum 45 leh ni 73-a upa niin Wales tan England lakah a khung.