Freixa-a'n Neymar laklet a tum lo

Barcelona president nih tum zinga mi Toni Freixa chuan Neymar laklet a tum lo, tun dinhmunah chuan Brazilian forward hi a dah sang lo hle tih a sawi tel bawk.

Neymar hian Catalan club aṭangin Paris Saint-Germain chu pound maktaduai 200 zetin a pan a, khawvel player manto ber a ni. Paris club hi Ligue 1-ah a hlawhtlinpui a, an lakluh chhan Champions League erawh an la chawi thei lo.

Freixa chuan, "Tun dinhmunah chuan Europe a player ṭha zual 30 zingah pawh a tel lo," tiin Neymar chungchang a sawi a, President a ni thei a nih chuan ṭul lo taka hun khawhral mai mai a tum loh thu a sawi tel bawk a ni.

Neymar hian PSG tan season lina a hmang mek a, inelna hrang hrangah match 93 a khelh aṭangin goal 73 a khung tawh. Hliam a nei fo a, khelmual chhung leh pawnah boruak duhawm lo a nei zeuh zeuh bawk.

French champion PSG hian an elpui Monaco an ngam loh hnuah RB Leipzig chu UCL lamah an hneh leh tawh. Zanin dar 1:30 hian Ligue 1 khel turin Bordeaux an mikhual zui leh ang.