Liverpool 100% home record titawptu Burnley

Inrinni zan Anfield inkhelah Liverpool chuan 1-1 in Burnley an inhnehtawkpui a, Premier League season khata mahni muala chak vek record siam an tum chu club 'naran' takin an tihtawpsak. 

Liverpool hian minute 34-naa Andy Robertson ball tauh luh ṭha tak hmangin hmahruaina goal an khung a, mahse Burnley hian minute 69-naah Jay Rodriguez hmangin an chhanglet. Reds-in 71% zet ball chang chunga Burnley an nawr chungin goal dang an khung thei lo a, Clarets si ban nghaktu Nick Pope-a'n England number one goalkeeper ni tura a ṭhat tawkzia pholan nan a hmang.

Liverpool tan captain Jordan Hernderson chu a inlan thei lo a, Brighton & Hove Albion 3-1 a an hneh ṭuma inhliam midfielder hi season tawp thleng a inlan thei tawh dawn lo. 

Hendo hmunruakah hian rawlthar beiseiawm Curtis Jones chuan a vawi khat nan Premier League-ah bul a ṭan a, player thiam tak ni mah se a puitlin tawk lohzia hmuh turin a awm a, hun ṭha a khawhral nual. Mohamed Salah hming lam hmaih theih a ni lo. Egyptian forward hian scoresheet-a a hming nem kai a tum luatah chance ṭha vawi tam a hlah a, Pope-a chet ṭhat vang tiin a sawi theih bawk. 

Burnley tan Pope chuan vawi riat ngawt save a nei a, vawi 23 zet shot-a hmachhawn - hetihlai hian Reds an vanduai tia sawi theih a ni bawk a, Roberto Firmino-a'n post a tih per te kha ui vawng vawng tham a ni. Clarets hian hun tawp hnaih lamah Johann Berg Gudmundsson hmangin bar an tih per bawk a, an vanduaina an sawi duh chuan sawi tur an nei ve tho. Hetihrual hian Alisson leh Virgil van Dijk ten anmahni ang thoa tharum ngah leh sang an hmachhawn chuan talbuai thei an ni tih pholanin a awm bawk. 

Liverpool boss Jurgen Klopp chuan, "Liverpool leh Pope kan inhmachhawn ni bera a lan chang a awm ṭhin a, a khel ṭha takzet. Mahse, kha aia tam zawk kha goal khung tur erawh kan ni," tiin a sawi.