Conte dinhmun a derthawng?

Inter Milan coach Antonio Conte dinhmun a nghet lo a, Italian manager hian krismas hmain an ban a nih chuan ama thiam loh leh mawhphurhna a nih tur thu a sawi chhuak.

Serie A match riat an khelh tawhah Inter hian point 15 an hmu a, table-ah pangana dinhmun an luah. An chungah hian AC Milan, Sassuolo, AS Roma leh Juventus an awm.

Champions League-ah pawh Conte-a naute hian beisei an phak lo, group match khelh hmabak chu la nei mah se an tan kawng a zim tawh hle - thil mak a thleng a nih ngawt loh chuan last 16 an luh a rinawm lo.

Conte chuan, "Hna thawh hmabak leh hmachhawp a la tam hle, kan hmabak hlen hman loa hna ka chan a nih erawh chuan keima thiam loh a ni ang. Season bul kan ṭan dan hi duhthusam chu ni lo mah se lawmna lai zawngtu tan chuan lawmna tur a awm," a ti.

Season hmasa khan Conte hian club thuneitu lam aṭanga thlawpna a dawn ṭhat tawk loh thu a sawi, kuminah erawh thlawpna a dawng ṭha tawh niin a sawi, a duh leh tum ang erawh chuan result an nei ṭha rih lo thung.