Mizoramin goal khung thei lo

Nimin khan Tilak Maidan-ah Mizoramin goal an khung thei lo a, 0-0 in an ṭin a, Punjab nen point khat an insem.

Santosh Trophy vawi 71-na Group B inkhel dangah Kerala-in an vawi khat inlanaah Railways 4-2 in an hneh a, semifinal luh inchuh boruak a nung nghal.

Vawi khat champion tawh Mizoram leh vawi riat champion-a champion ngun ber dawttu Punjab hian point 4 ve ve an hmu tawh a, Lalsangzuala Hmar hote hi goal difference-a an ṭhat zawk avangin group hmahruaitu an ni.

Kerala-in point thum hmuin pathumna an ni a, Railways erawh vawi hnih an chak tawh loh avangin beisei an nei tlem tawh. Maharashtra-in point la hmu lo mah se vawi khat chiah an la inlan avangin sawi bo theih an la ni lo.

An vanduai
Coach Sanga'n Maharashtra hneh team aṭangin player pakhat chiah a thlak danglam a, inhliam Lalmalsawma aiah Under 21 player tho Israel Laldingheta chu luhtir a ni.

Mizoramin bul an ṭan ṭha a, minute riatna leka Lalsangbera ball pet chu keeper Paramjit Singh-a'n a hnek chhuak hman. Hemi aṭanga an corner hmuh chu Ramfangzauva'n petin Lalchhuanawma Vanchhawng-in tauh fuh mah se Punjab chhan­­himtu chu keeper bawk a ni.

Minute 27-naah Sangbera ball cross chu Lalbiakhlua'n nang fuhin Mizoram winger hian keeper Paramjit chauh hmachhawn mah se a khung thei lo. First half tawp lamah Punjab tan Rajbir Singh-a'n a hun ṭha neih a hmang ṭangkai thei lo a, hei aia chance ṭha hi a kawppui Amandeep Singh-a'n a hlah leh bawk.

A goal thei lo
Second half-ah Punjab-in inkhel bul an ṭan ṭha zawk a, goal khung pawh an khung teuh nghal hle.

Mizoramin insiamṭhat nan minute 10 an mamawh a, Chhuantea ball pet chu Punjab defender-in dang perin keeper Paramjit pawh tlu sual tawh mah se hnai tak aṭangin Biaktea'n goal ruakah a tlawh lut thei lo.

Mizoram hian hun tawp lamah chauh chance ṭha an nei tawh a, amaherawhchu keeper Paramjit bawkin hming ṭhat nan a hmang.

Inhliam vanga Chhuantea aia lut R. Laldinliana shot-cross chu keeper-in khawih fuh thei lo mah se crossbar a per hnuah goalline a pel hman lo (?) a, Mizoram striker F. Lalrinpuia sut luh hmain keeper a inrawlh hman bawk.

Injury time-ah right back Israel-a'n kawh zetin goal-ah a pet a, keeper Paramjit bawkin a dang. Punjab an lian ṭha a, ṭantirh aṭangin defensive game khelh an pawi ti lo a, Mizoram lakah an game plan a hlawhtling - point an hlawh chhuak.

Eng nge an sawi?
Mizoram coach Lalsang­zuala Hmar chuan, "Punjab an len ṭhat avangin khelh an har a, corner kick an hmuh pawhin an defender paliin halfway line an pel ṭha duh lo. Hei hian defensive game an khel tih a nemnghet a, kei ni aia an len zawk miau avangin ball an vawrh nasa a, kan duhthusamin kan khel thei lo a ni," a ti.

Manager Lalthan­zama Vanchhawng chuan, "Kan khingpuite counter attack-ah an innghata a, tharum an ngah avangin khelh an harsa a, referee-in foul tura ngaih a ham lo fo a, khelh a harsat phah bawk. Chak phu zawkah kan inngai a, chutihrualin Punjab draw hi result chhiaah kan ngai lo," tiin Vanglaini palai a hrilh.

Hmabak
Group B team-te an vawi thum inlan hunah Mizoram an âwl dawn a, hahchawlhna hun ṭha a nih bakah Punjab leh Kera­la te an inkhelh dawn avang­in an chawlh hun hi duhthusamah a ngaih theih.

Mizoram hi Pathianni tlaiah Kerala nen an intum ang a, he result hian semifinal lut tur a hril thui hle ang.

Champion lai chak lo
Services-in an match hmasak berah West Bengal 0-1 in an hneh lo. Santosh Trophy-a champion ngun ber Bengal hi Basalts Singh goal hmangin an chak.

Inkhel dangah Chandigarh-in Meghalaya 2-1 in an hneh a, North East aiawh pakhat zawk hi an vawi hnih chak lohna a nih avangin tla thei dinhmunah an ding ta a ni.

INELNA THLIRNA TAWI
GROUP A
Vawiin Inkhel Tur
4:00 PM Services Vs Chandigarh
4:00 PM Goa Vs West Bengal
Round 13 - Fixtures
March 14, Thawhlehni
West Bengal 1 - 0 Services
WES : Basalts Singh 24'

Chandigarh 2 - 1 Meghalaya
CHA : Gangandeep Singh 6'; Sehijpal Singh 90+2'
MEG : Kitboklang Pale 52'
Team Dinhmun
# Team Pld W D L GF GA GD Pts
1 West Bengal 2 2 0 0 2 0 2 6
2 Goa 1 1 0 0 2 1 1 3
3 Chandigarh 2 1 0 1 2 2 0 3
4 Meghalaya 2 0 0 2 2 4 -2 0
5 Services 1 0 0 1 0 1 -1 0

INELNA THLIRNA TAWI
GROUP B
Nimin Inkhel Results
Punjab 0 - 0 Mizoram
Railways 2 - 4 Kerala
Team Dinhmun
# Team Pld W D L GF GA GD Pts
1 Mizoram 2 1 1 0 3 1 2 4
2 Punjab 2 1 1 0 2 1 1 4
3 Kerala 1 1 0 0 4 2 2 3
4 Maharashtra 1 0 0 1 1 3 -2 0
5 Railways 2 0 0 2 3 6 -3 0