Boro : Woodgate - Out, Warnock - In

Championship club Middles-brough chuan nimin khan manager Jonathan Woodgate an ban thu leh Leeds United defender hlui thlak nan Neil Warnock an lakluh thu an puang.

Boro hi Championship-ah 21-naah an awm mek a, relegation zone-a awm Hull City nen point 41 ve ve an hmuh avangin an dinhmun hi a derthawng hle. 

Covid-19 vanga inkhelh chawlh a nih hma khan Charlton 1-0 in an hneh a, amaherawhchu inelna ṭan a nih leh hnuah Swansea lakah 3-0 zetin an tlawm. An chak lohna hmun hi Riverside Stadium a nih bawk avangin Boro hruaituten Championship-a inhamtang turin manager thlak a ṭulah a ngai.

Kum 40 mi Woodgate hi Leeds United-ah a lar chhuak a, Newcastle, Real Madrid, Tottenham Hotspur leh Middlesbrough tan a khel a. Nikum June thla khan a career tihtawpna Boro a enkawl ṭan a, beisei angin manager hna a chelh hmasak berah a che ṭha tawk lo.

Boro manager thar Neil Warnock erawhin tawnhriat a nei ṭha hle. Kum 71 mi Warnock tan Boro hi club 16 a enkawlna chiah a ni a, English manager hian nikuma Cardiff City a chhuahsan hnuah club a la enkawl leh lo.

Match riat khelh tur la awmah Warnock hian Boro hi Championship-ah in ham tan pui a tum dawn a, Inrinni zan dar 7:30 hian Stoke City hmachhawn turin Britannia Stadium an tlawh ang.