Nadal-a'n last 16 a lut

Rafel Nadal-a'n Fer­nando Verdasco hnehin BNP Paribas Open last 16 a lut a, tukin zing dar 5:30 khan Roger Federer nen quarterfinal hmunruak in­chuhin an in­hma­chhawn zui leh nghal.

Thawhlehni zan Indian Wells-a inkhelah seeded pangana Nadal hian 6-3, 7-5 in hnehna a chang. Kum 30-a upa Nadal hian he inelna bika match 50 a chakna tawng tur hian darkar khat leh minute 29 hun a hmang. Nadal hian kum 2007, 2009 leh 2013 khan BNP Paribas Open nomawi hi a lo chawi tawh.

ATP World Tour Mas­ters 1000 zinga khelh hmasak ṭhin Indian Wells-a vawi li champion tawh Federer chuan darkar khat leh minute 34 chhungin American star Steve Johnson chu 7-6(3), 7-6(4) in a hneh.

Grand Slam vawi 18 champion tawh Federer hi Open Era bikah chuan mipa singles player zingah major title la hnem ber a ni a, kumin January thla khan Australian Open final-ah Nadal hi a lo hneh tawh.

Inkhel dangah world number 1 Novak Djokovic chuan Rio Olympic-a a ngam loh Juan Martin del Potro lakah 7-5, 4-6, 6-1 in phuba a la. Serbian tlangval Djokovic hian Alexander Zverev hneh­tu Nick Kyrgios a hmachhawn dawn a, a chak chho a nih chuan Nadal leh Federer te inkhela chak zawk a la hmachhawn leh thei dawn a ni.