Madrid-ah Courtois kal tum lo

Real Madrid leh Atletico Madrid nena sawizawm hlawh mek Chelsea goalkeeper Thibaut Courtois chu season tawpah La Liga lama kir leh tur anga sawi ni mah se Belgium international chuan Stamford Bridge chhuahsan a tum loh thu a sawi.

Kum 24-a upa goalkeeper chuan, "Madrid khaw lama kir tumna ka nei lo. Chelsea-a khelh hi nuam ka ti a, hlawhtlinna chhar belh zel turin ka inbuatsaih mek a ni. Kum 10 mi lek ka nih aṭangin English ka hmang thei tawh a, he hmunah hian harsatna ka nei lo. Season tawpa Premier League nomawi chawi hi ka lungkham ber chu a ni," tiin thil dang ngaihtuah hmanah a inngai lo.

Chelsea aṭanga goalkeeper rinrawl ṭhin Petr Cech nek chhuak theitu goalkeeper hian season thum chhung chu Atletico Madrid-ah loan-in hun a lo hmang tawh a, Spain-ah kir leh pawh ni se harsatna a nei lo ang.