Bagan ngam loh Bengaluru

Thawhlehni zan khan AFC Cup group stage inkhelah Bengaluru FC leh Mohun Bagan an inhmachhawn a, Bangalore club-in an khelmualah si phur hmasa zet mah se minute 57-naa Sunil Chhetri goal khung chhawr ṭangkaiin Kolkata club hi 2-1 in an lehthal.

Tlawm duh lo

Kanteerava Stadium, Banga­lore-a inkhelah mikhual team an tlangnel a, inkhel ṭan aṭanga minute 36-na lekah Bagan tan Katsumi Yusa chuan penalty a-ṭangin goal hmahruai a khung a, I League-a beisei phak lo Bangalore club fan-te an reh duk.

Mahse, Bengaluru-in an hmelma Bagan lakah tlawm an duh lo. Kar hmasa league match a an inhmachhawn ṭum­in team pahnih hi goal khung loin an inhnehtawk tawh a, Bengaluru CEO Parth Jindal chuan an inhmachhawn hma hian, "I League nomawi kan chawi thei tawh lo a nih pawhin Mohun Bagan chu i chawitir bik lo ang u," tiin twitter-ah a ziak a, Kolkata club hneh loh a duh lo.

Bengaluru player-ten an club hotute leh fan-te rilru an hrethiam a, minute 51-naah Sandesh Jhingan chuan an si phurh sutna goal a khung. Minute ruk a liam hman chauh a, free kick aṭangin Sunil Chhetri chuan chakna goal a khung. Team pahnih hi international break hman zawh a nih hnua an league match hmasa ber April 1-ah an inhmachhawn leh ang.

Mizo tlangval

Bengaluru tan Daniel Lal­hlim­­puia chuan inkhel bul a ṭan a, Serchhip rawlthar khel ṭha mah se hun tawp dawna a hun ṭha neih a chhawr ṭangkai thei lo. Mohun Bagan coach Sanjoy Sen-a'n Scottish striker Darryl Duffy bench-ah dahin Mizo tlangval Jeje Lalpekhlua chu Balwant Singh nen a inkawptir a, duh a thlang sual lo.

Hnahthial tlangval Jeje hian first half-a an penalty hlawhchhuahna kawngah a thawhhlawk a, Sony Norde nen mawi taka ball an inpek kual karah Haitian forward hi penalty area-ah pawh tluk a ni. Bagan-in penalty an hmuh phah a, Japanese midfielder Katsumi chuan goal-ah a chantir.

Chak phu inti Sanjoy

Mohun Bagan coach Sanjoy Sen chuan, "First half-ah khan chak thei kan ni tawh a, Jeje khan goal hnih emaw goal thum tal chu khung tur a ni. Mahse, football hi minute 90 khelh a nih avangin chawlhlawk hmaa chet ṭhat chhawm nun lohin awmzia a nei lo a, hliam vanga Katsumi lakchhuah a nih hnuah phei kha chuan kan talbuai takzet a ni," a ti.

Bengaluru FC coach Albert Roca chuan, "Game harsa tak a ni a, kan pahnih inhmachhawn hi chu India rama inkhel hautak ber pawl a ni. First half-ah kan khelh ṭhat loh avangin thawhleh kha a harsa em em a, mah se kan beidawng duh lo tih kan pholang a ni," tiin a naute khelh dan a chhuang hle.