Badminton thiam chungchuang Chong Wei

Malaysian prime minister parukna leh ṭanglai ni bawk Najib Tun Razak-a'n 'Hnam pasalṭha' tia a koh Lee Chong Wei chuan Pathianni zan khan 2017 All England Super Series Premier Badminton Championships final-ah Shi Yuqi a hneh a, khawvela badminton inena upa berah a vawi li nan a champion - 'National Hero' tia koh hi a phu!

Lee Chong Wei hi Chinese badminton player a ni a, a chawr­chhuahna tak erawh Bagan Serai, Perak, Malaysia a ni. Chinese chhungkua aṭanga piang ni mah se infiamna khawvel a luhchilh hnuah pawh a pianna ram Malaysia hming­in a inlan zui a, Olympic silver medal pathum a dawng tawh.

Bulṭanna...

October 21, 1982 khan hawvela badminton star langsar berte zinga mi Chong Wei hi a lo piang a, kum 11 a nih aṭangin badminton a khel ṭan, chhunah school a kal hnuin tlai lamah infiamna lam a luhchilh ṭhin - kum 17-a upa chauh a nih laiin ram tan khel tura koh a ni der tawh.

Badminton khel thiam bik ni mah se beisei angin a hlawhtling nghal bik lo. Nomawi langsar chawi turin kum 2004 a nghah thlen a ngai. Hemi kum hian Malaysia Open leh Chinese Taipei Open-ah a champion a, a vawi khat nan Olympic-ah a inlan. A kum lehah Malaysia Open leh Denmark Open nomawi a chawi leh a, World Championships-ah bronze medal a chawi bawk.

Hlawhtlinna

5feet leh 7.5 inches a sang Chong Wei-a'n kum 2004 aṭang­a hlawhtlinna a chan hunah hnung­lam a hawi leh tawh lo. Swiss Open leh Asian Badminton Cham­pionships-ah hming a chher zui. Commonwealth Games 2006 khan singles leh mixed team-ah gold a la a, Badminton World Federation's world ranking-ah number 1 ni zui bawk.

Kum 2007 a herchhuah chuan Lee hi shuttler dangte tana elrawn tham a ni tawh. Indonesia Open, Philippines Open, Japan Open leh French Open nomawi a kawl khawm vek. Kum 2008 khan National Badminton Grand Prix Final-ah a zawna a vawi sarih nan a chak leh bawk a, Super Series Masters Final-ah a chungnung ber bawk a ni.

Malaysia ram pawnah Chong Wei hian ngam theih loh a nei. A hming chu Lin Dan a ni, Chinese shuttler hi Olympic final-ah vawi hnih a hneh lo tawh. Kum 2009 khan Swiss Open nomawi chawi turin Lee hian Lin Dan a hneh - he mi kum hian Indonesia Open, Malaysia Open, Grand Prix Gold, Macau Open leh Hong Kong Open-ah te a hlawhtling zui leh bawk.

Malaysian National Ambassa­dor for UNICEF Chong Wei hi Malaysian shuttler zinga chawlhkar 199 chhung zet world number 1 ni thei hmasa ber a ni a, khawvelah ani chiah hi kum khat chhung ranking chung bera awm tluan thei a ni.

Lin Dan vang

Khawvela badminton player ropui berte zinga mi chu a ni ngei a, mahse Lee hian Olympic gold medal erawh a la hlawh chhuak lo. Beijing leh London Olympic-ah final a lut a, world champion vawi nga ni tawh Lin Dan a ngam lo.

Nikum Rio Olympic-ah khan shuttler ropui pahnihte hi semifinal-ah an intawng leh. Lee hian 15-21, 21-11, 22-20 hnehna changin final a lut. Beiseina sang tak nen gold medal match khel mah se Chinese shuttler dang Chen Long lakah 21-18, 21-18 in a tlawm. Olympic hnuhnung pathuma final khel vek thei Lee hi 2020 Tokyo Olympic-ah chuan kum 37-a upa a lo ni tawh dawn a, gold medal beisei bo la ni lo mah se dam rei nghah thil a ni tawh.

Lee Chong Wei hi Malaysian badminton player ve tho Wong Mew Choo nen hun rei tak an inkawp hnuah kum 2009 khan an inṭhen a, kum 2012 khan innei lehin fa pahnih Kingston leh Terrance an nei tawh. Lee hian autobiography 'Dare to be a Champion' chu kum 2012 khan a lo ti chhuak tawh a, a lehkhabua a thu ken pui ber pakhat chu 'Training leh inkhelh tak takna hmunah ka theihtawp ka chhuah ṭhin tih leh khawvela badminton chawisan zel' a ni.