Chênna ngai loh ramah Leicester

Premier League champion Leicester City chuan chenna ngai loh ram an fan chhunzawm zel - Thawhlehni zan khan Champions League last 16 second leg-ah Sevilla chu 2-0 in an hneh a, inkhel pa­hnih belhkhawmah 3-2 a an chung­nun zawk avangin Cham­pions League an khelh vawi khatnaah quarterfinal an lut nghal!

Foxes-in khawvel bara­khaiha Premier League nomawi chawipuitu Claudio Ranieri an ban hnuah an 'harhtharna' chan an chhunzawm zel a, season hmasaa Italian manager thilmak tih ang kha amah thlaktu Craig Shakespeare hnuaiah an beisei ngam leh ta - Ranieri thachhang dawl ṭhintu manager enkawlna hnuaiah hian match thum khel tawhin hnehna an chang vek.

Captain Morgan

Leicester-in season hmasaa Premier League nomawi an chawina kawngah defender Wes Morgan a pawimawh a, club captain a nih bawk avangin 'Captain Morgan' ti kherin media te chuan a chanchin an sawi ṭhin - a hun takah Jamaican defender hi a team tan a rah leh ta.

Inkhel ṭan aṭanga minute 27-na lekah kum 33-a upa defender hian goal hmahruai a khung a, Riyad Mahrez freekick pet ṭha zet chu a pal lut. Sevilla-in Foxes lakah tlawm duh loin Leicester tlarhnung rum ṭhaih fo mah se a pawimawh ber goal an khung thei lo a, minute 54-naah Marc Albrighton hmanga hrem an ni. English winger hian Mahrez ball pet Sevilla defender Adil Rami-a'n a lo dan per chu a awma la thlain goal-ah a pet a, net a tawn puar chiang hle.

Foxes vanneihna

Leicester vanneihna a kal­tluang a, Samir Nasri chu minute 74-naah a yellow card pa­hnihna a hmuh avangin hnawhchhuah a ni. French midfielder hian goal khung ngeina tur nia langah vawi hnih zet goal a khung lo a, a tan chuan zan theihnghilh daih tlak a ni. Nasri mai a ni lo, Sevilla boss Jorge Sampaoli chu hnawhchhuah a ni bawk!

Foxes tan first leg-a penal­ty dangtu keeper Kasper Schmeichel bawk a langsar a, Danish goal­keeper hian Steven N'Zonzi penalty pet chu ṭha takin a dang.

Sevilla tan Sergio Escudero chuan goal bar a pet per dawp bawk a, Schmeichel-a'n tih theih a neih loh ṭum pawhin goal bar-in Foxes a venghim - Europe a club ṭha pariat zingah Leicester an tel a, Barcelona, Bayern Munich, Borussia Dortmund, Juventus leh Real Madrid-te nen huang khatah an awm ta!

Mang ram

King Power Stadium-ah William Shakespeare-a'n Mark Antony kaltlanga "Let Slip The Dogs of War" (A thlun phelh angin bei ang aw) tih ṭawngkam a hman chu tarlan a ni a, he thu ang chiah hi Leicester player-te khelh dan chu a ni. Foxes manager Shakespeare-a'n hun tam a nei lo tih hriain kalphung thar duan ai chuan season hmasaa an champion-naa players rual rin a thlang a, N'Golo Kante a awm tawh loh avangin a aiah Wilfred Ndidi khelhtir a ni ṭhin tih loh chu Shakespeare hnuaiah inthlak danglamna hmuh tur a awm lo.

Shakespeare-a'n he kal­phung hnuaiah hian Liverpool leh Hull City a hneh tawh a, Champions League quarterfinal lut turin season thum chhung a zawna Europa League nomawi chawi thei Sevilla an pet chhuak leh ta. Inkhel hamrik a tawp rualin Leicester fan-te hlima zaiin an lam a, an thil tawn mek chu mak tiin an awih lo hial ang - beisei loh taka Ranieri ban a nih hnuah khan King Power Stadium-ah heti tak hian hlimnain ro a rel leh thei ang tih hi mi tam tak rin phak leh beisei ngam loh a ni.

Tih theih loh

Leicester City captain Wes Morgan chuan, "Mi zawng zawng rin loh taka Premier League nomawi kan chawi ang kha a thleng leh ang em, ka hre lo a, mah se mi tam takin min rin lohna chu thaichhiat sakin tih theih loh nia lang chu kan ti leh ta a ni," tiin a hlim hle.

Morgan chuan sawi chhun­zawmin, "Kan hmaah tupawh lo ding se kan hlau lo. Leicester tan chuan zanin hi zan danglam a ni a, league-ah kan him nan kan rilru zawng zawng kan la sen a ngai tih hre mah ila tun hi chu hlim hun a ni," a ti.

Ranieri vang

Italian manager Ranieri ban a nih hnuah season tawp thlenga Foxes enkawl tura ruat Shakespeare-a'n a pu hlui a theihnghilh lo. Premier League nomawi an chawina kawnga Ranieri thachhang dawltu manager chuan, "Claudio kha he club tana a hnathawh ropui tak avangin hriatreng a hlawh tawh dawn a, a enkawlna hnuaia first leg-a kan khelh dan khan zanin atan hian beiseina min siamsak a ni," a ti.

Leicester boss Shakespeare chuan sawi chhunzawmin, "Kan khingpuite thiamna leh theihna en chuan zanina kan hlawhtlinna hi club chanchin ziahna pheka ziah tel chi a ni. He club-a inhnamhnawih zawng zawng tan zanin hi hriatreng tlak a ni a, Champions League-a thil mak thlentirtu kan ni lo ang tih tu nge sawi thei," tiin a inringtawk hle.