Ramhlun Armed Veng South an chak

NECS Cup vawi hnih champion tawh Ramhlun South chuan Venghlui 1-0 a hnehin quarterfinal an lut a, nimin inkhel hnu­hnung zawkah Armed Veng South chuan Republic Veng lehthalin 2-1 in hnehna an chang ve bawk.

Nimin Lammual in­khel hmasa zawkah Veng­hlui lam first half-ah chung­nung hret mah se Ramhlun South tana ve­teran midfielder Samson Ramengmawia luh hnuah inkhel a danglam. Venghlui defender tih­sual nangchingin Ram­hlun South forward R. Lalthanmawia chuan minute 59-naah goal awmchhun a khung a, Amawia hi man of the match-ah thlan zui a ni.

MPL5-a Chanmari West coach HC Zarzo­liana enkawl Ramhlun South hian kum dang ang­in player langsar kawl hnem lo mah se inkhelh thiam veng an nih avangin tualchhung football-a tawn­hriat nei player an kawl nual a, rinkai zingah an tel pha.

Armed Veng South-in an veng ṭhenawm Armed Veng phuba laksakin Republic Veng an hneh a, hnehna chang turin R. Lalhlimpuia enkawl team hi an vanduai-vanneiah a ngaih theih. Republic Veng tan Rorelliana'n Armed Veng South keeper VK Sawma tihsual nang chingin minute 22-na lekah goal hma hruai a khung.

Hemi hnu hian Armed Veng South-in inkhel an thunun a, defender C. Lal­biaksanga'n wood­work vawi thum tihperin forward Lalnunsanga (Talea) ten chance ṭha an hlah bawk. Inkhel thununtu Armed Veng South hun tawp lamah an vannei a, Republic Veng defender Jacob Zosang­liana handball vanga an penalty hmuh chu Talea'n goal-ah a khung.

Extra time khelh a ni a, Bengaluru FC academy-a awm Laldawngliana Colney chuan ṭan aṭanga minute lina lekah Armed Veng South chakna goal mawi zetin box pawn aṭangin a khung a, defender handball vanga an penalty vawi hnih hmuhna erawh Talea'n a hmang ṭangkai thei lo mah se man of the match-ah thlan a ni.

Nimin Inkhel Results
Venghlui 0 - 1 Ramhlun South
RAS : R. Lalthanmawia 59'
MoM : R. Lalthanmawia, RAS
Republic Veng 1 - 2 Armed Veng South
REP : Rorelliana 22'
ARS : Lalnunsanga 83'(P); Laldawngliana Colney 94'
MoM : Lalnunsanga, ARS