England leh Ireland hero Jack Charlton a thi

13th July, 2020

England-in 1966 World Cup an champion ṭuma player pawimawh Jack Charlton chu kum 85 mi niin July 10, Zirtawpni khan a thi. Jack hi a hun pum Leeds United tana hmangtu 'one club man' a ni a, Leeds legend a nih bakah hlawhtling taka Republic of Ireland a enkawl avangin Ireland hero a ni bawk.

Leeds defender hlui Jack hi nikum khan cancer a vei tih hmuhchhuah a ni a, kum upat lamah rilru mang (dementia) a nei tel bawk. Jack hi Manchester United legend Bobby Charlton-a u a ni a, 1966 World Cup-ah khan England tan an khel dun a ni.

Jack-a chhungte chuan, "July 10, Zirtawpni khan Jack hi kum 85 mi niin hahdam takin a chenna Northumberland-ah chhungte awmpuina hnuaiah a thi. Amah hi mi tam takte ṭhian a ni a, chhungkaw tan pasal, pa leh pu ṭha tak a ni.

A damchhung hun ṭha taka a hmang hi kan chhuang a, mi ṭhahnem tak tana hlimna a siamsak avanga kan lawmna hi thuin kan sawifiah zo lo. Pa ṭha tak, kawm nuam leh fel tek a ni a, midang hun a insiam thiam hle. A hmunruak zau tak hi hnawhkhah theih a ni dawn lo a, chutihrualin kan nunah hriat reng tlak hlimna a thlen avangin kan lawm hle a ni," tiin thuchhuah an siam.

Jack Charlton hi May 8, 1936 khan Northumberland, England-ah piang a, Leeds United-ah inzir chhuakin English club hi first division (a hunlaia league sang ber), second divison, FA Cup, League Cup leh Charity Shield vawi khat ṭheuh a chawi pui a, Inter-Cities Fairs Cup-ah vawi hnih a champion pui bawk. England tan pawh Jack hian record ṭha tak a nei a, football boot a khai hnuah manager ṭha tak a ni chhunzawm. Middlesbrough leh Sheffield Wednesday a enkawl hnuin Jack hian Republic of Ireland a enkawl a, kum 1990 khan a vawi khat nan World Cup a khelhpui. Hei chauh hi ni loin 1988 Euro a thlenpui a, 1990 World Cup-ah hian quarterfinal hial thlengin inelna thlengtu Italy an hneh lo. 1966 World Cup final hattrick siamtu Geoff Hurst chuan, "Mi tin ngainat nungchang a nei a, kan ngai dawn hle a ni. Football khawvelin mi ropui pakhat chu a chan leh ta a, ṭhianpa mangṭha hle," tiin Jack a thlah.