Ibra hoin United inlan dawn

Manchester United-in Zlatan Ibrahimovic tel loin FA Cup quarterfinal-ah Chelsea an hneh lo a, zanin dar 1:35-a Rostov an mikhual hunah erawh English club hi Swede forward Ibra-a'n a ho ang.

Europa League team 16 an la dam a, zanin hian quarterfinal lut tur a chiang ang. Old Trafford-a United leh Russian club inkhel hi Ten 2-ah a en theih ang.

United an tla hniam!

Thawhṭanni zana United-in Chelsea an hneh loh chiah khan Jose Mourinho hote tan an match hnuhnung 29-a an vawi hnih chak lohna chauh a ni. Amaherawhchu Red Devils hian EFL Cup final-a Southampton an hneh ṭum aṭang khan khelmual chhungah ngai an awh tawh lo.

FA Cup-ah United-in beisei tur an nei tawh lo a, league-ah palinaa awm Liverpool point rukin an pha lo. A êng zawnga thlir erawh chuan Mourinho hote hi an hmelma Reds aiin match hnihin an khel tlem a, Europa League hmangin Cham­pions League khelh theih­na ticket an la thei bawk.

Zlatan telin

FA Cup quarterfinal-a hnawh­­chhuah Ander Herrera chu Eu­ropa League-ah erawh hrem a ni dawn lo a, Saint-Etienne nen hnawhchhuah a nih vanga first leg khel lo Eric Bailly chhawr theihin a awm bawk dawn.

United ṭantute tana thu lawm­awm bik erawh Zlatan Ibra­himovic hoin an khel dawn a, Swede forward hian tun season-ah match 40 khel tawhin goal 26 a khung tawh. PSG forward hlui a inlan theih chuan English club an huaisen sawt ang.

Rostov-in Russian Pre­mier League-ah Terek Groz­ny chu goal awm loin an mual Olimp-2 ah an draw a, Old Trafford-ah hrem vangin Aleksandr Gatskan leh Timofei Kalachev te an khel thei dawn lo. First leg-a inhliam defender Vladimir Gra­nat chu a inlan theih a beiseiawm lo a, first keeper Soslan Dzhanaev erawh in­hliam vanga first leg a khelh theih loh hnuah a rawn kir theih rin a ni.

Record ṭha United

Manchester United-in an muala European competition an khelhin record ṭha tak an nei a, match hnuhnung 15-ah hneh loh an tawng lo a, heng zinga 12-ah hian hnehna an chang bawk. Amaherawhchu thla 12 liam ta khan Liverpool hneh loin Europa League aṭangin an tla a, kuminah erawh quarterfinal thlen mai ni loin champion an duh ang.

Rostov hi tun season Cham­pions League aṭanga tla an ni a, Europe-a inelna sang ber khel thei turin Ajax an hneh. Group stage-ah Russian club hian Bayern Munich hi an hneh a, amaherawhchu Europe club lian an barakhaihna hmun hi an mualah a ni.

United-in sulhnu ṭha tak chhuan tur an neih laiin Rostov erawhin kum 2014-a Russia Cup an champion bak inelna sanga champion an la nei lo. Russian club-in England-a an match hnuhnung 26 an khelhah vawi hnih chiah hnehna an chang a, Rostov tan tun hi England an tlawh vawi khatna tur a ni.