Masvidal-a'n Kamaru Usman a ngam lo

UFC Welterweight champion Kamaru Usman chuan nimin khan a kawnghren kawl lai humhim turin Jorge Masvidal chu unanimous decision (50-45, 50-45, 49-46)-in a hneh a, vawi 17 fight a neihah vawi 16 hnehna a chang ta.

Usman chuan, "Jorge kha hmachhawn a hautak takzet a, fak a phu a ni. 'Gamebred' tia an koh chhan hian awmzia a nei a, hmachhawn a hautak em em reng ṭhin a ni. Mahse, ani aiin ka ṭha a, ka hmanraw bawmah hmanrua ka ngah zawk a ni," a ti. 

Kum 35 mi Masvidal hian Usman a hmachhawn hmain inbuatsaihna hun a nei tam hman lo a, Usman hmachhawn tura tih hmasak Gilbert Burns-a'n Covid-19 a kai avangin fight hmachhawn hma ni ruk a la awm tihah Usman a hmachhawn dawn tih hi a hre ve chauh a ni. Abu Dhabi-a neih UFC 251-a fight ngaihven hlawh dangah Alexander Volkanovski chuan split-decision  (47-48, 48-47, 48-47) hmangin Max Holloway a hneh ve bawk a, UFC featherweight title a kawl lai chu a humhim. Volkanovski chuan, "Round hmasa paliah khan kan inhnehtawk tih ka hria a, hnehna chang tur chuan round tawp bera chak kha ka mamawh tih ka hria a ni," tiin a sawi.