Pep-a enkawl Manchester City an tla
Pep Guardiola chuan manager a nih hnua Champions League aṭanga a tlak hma ber ṭum a tawng. Arab sum hmanga insiam lian Manchester City-in Champions League nomawi an duh vangin Guardiola an lalut a, Spanish manager-in tuna a thlen pui theih chin chu last 16 a ni!
Nilaini zan Stade Louis II-a inkhelah AS Monaco chuan Kylian Mbappe, Henrique Fabinho leh Tiemoue Bakayoko te goal hmangin Manchester City 3-1 in an hneh a, Etihad Stadium-ah 5-3 in chak tawh lo mah se inkhel pahnih belhkhawmah 6-6 a ni. Khualmuala goal khung hnem zawk Monaco chu 'away goal rule' hmangin an tlang - Leroy Sane goal khat khungin Premier League club a chhan thei lo.
Premier League club zingah Leicester City chiahin quarterfinal an thleng thei a, champion lai Real Madrid, Atletico Madrid, Barcelona, Bayern Munich, Borussia Dortmund, Juventus leh Monaco te chu a sang pariat zingah an tel bawk - vawiin hian Nyon, Switzerland-ah quarterfinal draw neih a ni ang.
A hming chu Mbappe
Ligue 1 hmahruaitu Monaco-in hliam vanga Radamel Falcao tel lo chungin quarterfinal lut turin a tlem berah goal hnih fai tala chak an mamawh. First leg-a goal hnih khungtu Falcao awm lo mah se Monaco hian innghahna tlak an nei - a hming chu Kylian Mbappe a ni.
Monaco tan hian Mbappe chuan minute riatna lekah Portuguese midfielder Bernardo Silva cross chu hnai set sawt aṭangin chiang zetin a khung, kum 18-a upa Mbappe tan tun season inelna hrang hranga a goal 17-na a ni. French club hian City an chhaih buai chhunzawm a, goal bula vengtu nei lo Fabinho chuan an goal hnihna khung turin harsatna a tawk lo a, Bakayoko-a'n tibuaitu nei loin an goal thumna a tauh lut bawk.
Kum 2004 Champions League finalist Monaco hian tun season-ah inelna hrang hrangah goal 123 zet an khung tawh a ni.
Thutlukna sual?
An khelmualah 5-3 a hnehna an chang tawh chungin Guardiola-a'n attacking game an khelh tur thu a sawi a, a thu sawi ang ngeiin an khel bawk. Monaco lamin goal nawr chi player panga an luhtir ṭhawt avangin Fernandinho tan a luhai thlak takzet. Tlarhnungte pui thiam leh tharum nei ṭha Yaya Toure chu bench-ah ṭhuttir a ni!
City-in goal an chhuah hnuhnung pahnih chu an tlarhnung tihsualah a ngaih theih. Six yard box bul lawkah Fabinho an thlahfal a, freekick aṭanga ball lo kal chu Bakayoko a duh tawkin an tauhtir bawk. Defender manto John Stones leh a dinpuite an mualpho chiang hle.
Barcelona a enkawl laia Champions League nomawi vawi hnih chawi tawh Pep hian season thum chhungin Bayern Munich chu semifinal-ah a tlakpui a, City-ah erawh quarterfinal pawh an thleng zo lo. Spanish manager hian attacking game khelh a duh luatah a tlarhnung lam a ngaihthah deuhah a ngaih theih. Qualifier chhiar tel lohin Champions League match khualmuala an khelh hnuhnung 11-ah clean sheet an nei miah lo, inenfiahna tur an nei.
Chhuanlam chu
Manchester City manager Pep Guardiola chuan, "Goal nawr a, goal khung belh ka duh. Hemi ti tur hian inhmuhkhawmna zawng zawngah player-te ka hrilh chiang a, ka thiam lohna lai chu ka duh anga khel thei tura ka hmin zo lo kha a ni. Second half-ah kha chuan ka thu angin an khel thei a, amaherawhchu a tlai hret tawh a ni," tiin tihsual a neih a pha lo.
Pep-a khelh duh dan phung erawh a la ngai reng, Pep chuan, "Manager zawng zawngin tihsual kan nei thei a, tun ṭuma mi hi chu kan khelh duh dan dik loh vang a ni lo. First half-a player ka thunun theih loh vang kha a ni," tiin an chetsualna chu tactical ni loin player hmin theih loh vang a nih thu a sawi.