Nadal leh Djokovic an tla

Nimin zing khan Roger Federer chuan Rafael Nadal hneh­in BNP Paribas Open quarterfinal a lut. Last 16 inkhel dangah world number 2 Novak Djokovic chu Nick Kyrgios lakah a chak lo ve bawk.

Indian Wells-a inkhelah vawi li champion tawh Federer hian seeded pangana Nadal hi 6-2, 6-3 in a hneh. Swiss tlangval Federer hian Nadal nen vawi 36 an intawn tawha a vawi khat nan a zawnin match thum chhung hneh­na a chang ta a, a pumpuiah vawi 13 a chakna chiah a ni bawk.

Kum 35-a upa Federer chuan, "Ka khel ṭha takzet, court chhungah ka khingpuite na taka ka nawr leh theih tak avangin ka lawm a, a bik takin backhand ka vuak danah ka lawm zual," a ti.

Grand Slam vawi 18 cham­pion tawh Federer hian Nadal laka hnehna chnag turin backhand hmangin ṭum ruk winners a vaw thei. Hei bakah hian a service a hum ṭhain Nadal-a service chu ṭum li ngawt a chhuhsak bawk.

Inkhel dangah seeded pahnih­na Djokovic chu kum 21-a upa Kyrgios lakah 6-4 7-6 (7-3) in a chak lo. Australian rawlthar hian semifinal lut tur chuan Federer a paltlang a ngai leh dawn.

Californian thlalerah hian Djokovic-a'n match 19 chhung zet chu hneh loh nei loin a kaltluang a, a zawna a vawi li nan champion ngei a tum bawk. Mahse, ni 12 liamta leka Mexico Open-a a ngam loh Kyrgios bawk a ngam lo leh ta.

Kum 29-a upa Djokovic chuan, "Nick ka hneh lo leh ta! Player naupangte la ni mah se a service a ṭha em em a, a first serve bakah second pawh ka vaw let ṭha hleithei lo - service kha kan danglamna a ni," tiin a hneh loh Kyrgios a fak hle.

Inkhel dangah seeded palina Kei Nishikori chuan Donald Young 6-2, 6-4 in a hneh a, khawtual tlangval Jack Sock chuan inkhel inhnehtawk takah 4-6, 7-6 (7-1), 7-5 in Malek Jaziri a hneh ve bawk.

Seeded pariatna Dominic Thiem-a'n tun hnaia khel ṭha tluang Gael Monfils 6-3, 6-2 in a hneh a, quarterfinal-ah Stan Wawrinka a hmachhawn leh ang. Grand Slam vawi thum champion tawh Wawrinka hian last 16-ah world number 70 Yoshihito Nishioka chu darkar hnih leh minute 13 chhungin 3-6, 6-3, 7-6 in a hneh hram.