Zaninah Tip Off neih a ni dawn ; Basketball inelna lian MSL3 a hnai
Mizoram chhunga basketball inelna lian ber Mizoram Super League Season 3 chu March 21, Thawhlehni zan aṭangin Hawla Indoor Stadium-ah khelh ṭan a ni dawn. Zanin hian Lal Thanhawla Auditorium-ah MSL3 khuh hawnna 'Tip Off' neih a ni ang.
Tip Off chu
MSL3 khuh hawnna hi zanin dar 8:00-ah neih a ni dawn a, he hunah hian oath taking, MSL3 handbook release leh jersey pholanna neih a ni ang.
MBBA hian 2017-18 chhung atana hruaitu thar thlanna an nei tawh a, president thar chu Malsawmtluanga, Zarkawt a ni. Tun ṭumah hian president kal chhuak tur Chalrosanga Ralte, MLA chuan MSL3 handbook hi a tlangzarh ang.
Inelna Kalphung
Team paruk inelna MSL hi hlawm hniha ṭhen theih a ni a, league round leh knockout round-ah dah hran theih a ni. League round-ah hian club-te chu vawi khat ṭheuh an inkhel kual ang. Match tinah hian a chak zawk apiangin point hnih (2) an hmu ang a, a chak loin point khat (1) an hmu ang.
League round-a a sang paliin semifinal an khel ang a, a hniam pahnihin relegation playoff an khel thung ang. Knockout round hi best of three a khelh tur a ni a, May 4 aṭanga khelh ṭan tur a ni.
VR4 chu 2018-ah
MSL4 Playoff-ah felhlel a awm avangin khelh chhunzawm a ni lo a, MBBA Division I champion Republic VR4-in Mizoram Premier League an khel dawn. Amaherawhchu Mizoram basketball inelna sang bera Republic Veng basketball inlan hun tur erawh season thar daih a ni.
MSL3-a team thar Chanmari Hollow hian nikum February thla khan VR4 hnehin basketball inelna sang ber khel turin an lo tling tawh . VR4 hian MSL khelh theihna hun ṭha an neih chu MSL2-a pangana Zarkawt BCA lakah an khawhral bawk.
MSL3-ah hian pangana leh parukna ten relegation playoff an khel leh ang a, heta chak zawk hian MSL khel chhunzawm turin MBBA Division I-a pahnihna Dawrpui Vengthar SC an hmachhawn ang.
State pawn pahnih
MSL vawi hnih neih tawhah Khatla TBL an champion ve ve a, nomawi an chawi theihna chu state pawn player an neih ṭhat vang a ni. MSL2-ah TBL hian India player pahnih Vishesh Bhriguvanshi leh Pratham Singh te an ṭangkaipui hle.
MSL3-ah pawh hian team tinin state pawn player pahnih an la thei a, league round khelh chhung hi player lak theihna hun a awm. Season hmasa pahniha Khatla TBL danglamna kha club dangin an hre fuh tawh a, coach leh player ni kawp H. Laldinsanga hote tan a lungthu kimna atana vawi thum champion a harsat phah sawt ang.
Fixtures
WEEK 1
March 21, Thawhlehni
7:00PM Khatla TBL Vs Chanmari Hollow BBSP
March 23, Ningani
7:00PM Tuikual South BC Vs Zarkawt BCA
March 24, Zirtawpni
7:00PM Mission Veng Vikings Vs Zarkawt Serpents
WEEK 2
March 28, Thawhlehni
7:00PM Zarkawt Serpents Vs Tuikual South BC
March 30, Ningani
7:00PM Chanmari Hollow BBSP Vs Mission Veng Vikings
March 31, Zirtawpni
7:00PM Zarkawt BCA Vs Khatla TBL
WEEK 3
April 4, Thawhlehni
7:00PM Mission Veng Vikings Vs Zarkawt BCA
April 6, Ningani
7:00PM Khatla TBL Vs Zarkawt Serpents
April 7, Zirtawpni
7:00PM Tuikual South BC Vs Chanmari Hollow BBSP
WEEK 4
April 11, Thawhlehni
7:00PM Mission Veng Vikings Vs Khatla TBL
April 12, Nilaini
8:00PM Chanmari Hollow BBSP Vs Zarkawt BCA
April 20, Ningani
7:00PM Tuikual South BC Vs Mission Veng Vikings
WEEK 5
April 21, Zirtawpni
7:00PM Zarkawt BCA Vs Zarkawt Serpents
April 27, Ningani
7:00PM Khatla TBL Vs Tuikual South BC
April 28, Zirtawpni
7:00PM Zarkawt Serpents Vs Chanmari Hollow BBSP