Mapuia Cricket League ; Vawiinah final khel tur a chiang dawn

Mizorama cricket inelna ngaihhlut ber Mapuia Cricket League chu vawiinah qualifier 1 leh eliminator round khelh a nih dawn avangin final lut tur team pakhat a chiang dawn.

Suaka Memorial Cricket Ground, Sihhmuia inkhel turah hian chawhma dar 9:30-ah Qualifier 1 khelh a ni dawn a, champion lai Chanmarians leh Chhinga Veng an inhmachhawn ang. Chawhnu dar 1:00-ah eliminator round khelh tur a ni thung a, eliminator round-ah hian Kulikawn CC leh Armed Veng an inhmachhawn ang.

Inelna kalphung

Mapuia Cricket League season 5-ah team panga Armed Veng CC, Chhinga Veng CC, Chanmarians CC, Kulikawn CC leh Zarkawt Lords an tel a, league round-a an intum kual vek hnuah a sang pali hi qualifier leh eliminator khel turin an inhlangkai.

Qualifier 1-ah hmahruaitu Chanmarians leh pahnihna Chhinga Veng an intum ang a, a chak zawkin final an lut ang. Eliminator round-ah pathumna Armed Veng leh palina Kulikawn CC an intum ang a, he inkhela chak zawk hian qualifier 1-a chak lo zawk team chu qualifier 2-ah hmachhawn lehin a chak zawkin final an lut ang.

Inkhel thlirlawkna

MCL match hmasa berah Chanmarians-in Chhinga Veng an hneh tawh a, 3C an tluk phah lo. Chanmarians an hneh loh hnuah insiam ṭhain an hmabak match thumah hnehna an chang vek a, pahnihna nichungin qualifier 1 an khelh theih phah. Chanmarians tan Chhinga Veng hneh tawh vang ngawtin inchhuan chi a ni lo a, an intawn hmasaka an chak ṭum hian run khat bakin an chak lo - an nomawi humhim tur chuan an fimkhur a ṭul ang.

Kulikawn-in net run rate chhiat vangin an match hnuhnung berah Zarkawt Lords an hneh ngei ngei a ngaih phah a, inkhel boruak sangah an talbuai phah lo - sum seng hnem Zarkawt hi run 68 zetin an sawp. Kulikawn hian league match-ah Armed Veng hi run 20-a an lo hneh tawh bawk avangin an zuam sawtin a rinawm a, chutihrualin Armed Veng hi wicket nga a champion lai Chanmarians hneh thei an nih avangin dah hniam theih an ni lo.