Hamilton a inthlahdah dawn lo

Lewis Hamilton tan Formula 1 tun season inelna neih hmabakah record thar siam tur a awm rih lo a, nomawi a kawl lai a humhim tawh bawk - Mercedes driver hian inthlahdah a tum chuang lo tih a sawi.

Inelna hnuhnung ber Turkish Grand Prix-ah Hamilton hian hnehna changin, a vawi sarih nan F1 champion a ni. Tun season bikah intlansiak vawi thum an la hmabak. Pathianni zan dar 7:40 hian Bahrain Grand Prix an tlan ang.

Hamilton chuan, "A nihna tak sawi chuan rilru chuan hahchawlh leh intih thawven chu a chak, amaherawhchu inelna a la zawh miau loh avangin chawlh ngawt theih a la ni lo.

"Intlansiak a la zawh loh avangin theihtawp ka chhuah chhunzawm zel dawn, driver dangte tana elpui hautak nih zel ka duh," tiin inthlahdah a la tum loh thu a sawi a, theihtawp a chhuah zui dawn.

Sakhir thlalera intlansiakna tlan kawng hi 5.4 km a thui a ni a, season hmasa khan Hamilton hian hnehna a chang. Nikuma chak tura rin, mahse chet buai avanga chak ta lo Ferrari driver Charles Leclerc nen an inel lehin a rinawm.