Champions League ; A thiam pariat zingah Atletico Madrid

Nilaini zan khan Champions League last 16 second leg-ah Atletico Madrid chuan goal khung loin an mikhual Bayer Leverkusen inhnehtawkpui mah se an intawn hmasak ṭuma 4-2 a hnehna an lo chan tawh avangin quarterfinal an lut.

Atletico Madrid striker Fernando Torres chu Depor­tivo La Coruna nen an inhma­chhawn ṭuma nikhaw hre loa a tluk hnuah a dam leh tawh a, Spanish striker hian bench lamah a hun a hmang tluan thung. Atletico hian pum na avangin Kevin Gameiro an chhawr thei lo a, Leverkusen lamin kum 17 leka upa an midfielder Kai Havertz chu sikul lamah exam pawimawh a neih avangin an chhawr thei lo bawk!

Keeper channa!

Vicente Calderon-a inkhelah team pahnihin goal khungna chance nei ve ve mah se an khung thei lo a, goalkeeper pahnih an che ṭha dun takzet. Leverkusen tan Julian Brandt leh Kevin Volland ten a zawn zatin an beiseina chhi nung turin chance nei ve ve mah se Atletico keeper Jan Oblak an paltlang zo lo a, Oblak-a tan a chet ran leh thiam zia 'show'-na hun remchang mai a ni.

Bayer keeper Bernd Leno sawi hmaih a thiang lo. Kum 25-a upa German goalkeeper hian penalty box chhung aṭanga Angel Correa shot dang turin a vei lamah ṭha zetin a inkhawh mar a, a ding lama Koke chance neih a thlawna chantir turin harsatna a nei chuang lo. First half-a hmuh tur awm mang lo Antoine Griezmann-a'n second half-ah mawi taka offside trap bumin chance nei mah se a ball 'chip' chu goal sirah a kal.

Simeone ropuina

Atletico striker Kevin Ga­meiro-a'n Leverkusen an mikhual hmain an tum ber chu Champions League nomawi chawi a nih thu a sawi a, coach Diego Simeone-a'n Atletico a enkawl hnua a nomawi chawi loh awmchhun a la nih bawk avangin Argentine manager tan an theihna zawng zawng an chhuah tur thu a sawi - kawng dik an zawh zel.

Season thum chhunga Champions League final vawi hnih khel thei Simeone hian season li chhung a zawnin Europe-a club inelna sang ber quarterfinal a luhna a ni ta a, 2013-14 season hnu lamah Ar­gentine manager sulhnu ropui ang nei thei hi manager zingah an la awm ve lo. Kevin Gameiro-a'n vawiina Atletico Madrid team chu Simeone-a din a nih thu a sawi a, a thusawi hi hnial theih a ni lo.

Bang rinawm Oblak

July, 2014-ah Oblak-a'n Ben­fica aṭangin Atletico Madrid a zawm a, a man zat chu pound maktaduai 12.6 a ni. Atletico-in Slovenian goalkeeper an lakluh chhan hi Chelsea lama an keeper Thibaut Courtois kir vang a ni a, hetih hunlaia Oblak-a ṭawngkam chu, "He hmunah hian midang thlak tura lokal ka ni lo a, he team jersey ha chunga result ṭha tak hlawhchhuahpui tura lokal ka ni," tih hi a ni a, Oblak a ṭawng sual lo - Courtois thlaktu keeper tih ai chuan Oblak tih hian football ngainatute thinlungah chuan a chiang tawh em em.

Oblak hian 2014-15 season-ah Champions League-a a match hmasa ber a khel a, hemi hnuah hian match 14 zet goal chhuah loin a awm tawh - Juventus keeper ropui Gianluigi Buffon nen 2014-15 season hnuah heti zat goal chhuah loh nei awm­chhun an ni. Season hmasaa La Liga goalkeeper ṭha ber Ricardo Zamora Trophy dawngtu keeper chet ṭhat hi Atletico tan a pawimawh chho zel ang.

Simeone thukhawchang

Atletico bakah Bayern Mu­nich, Juventus, Barcelona, Real Madrid, Borussia Dortmund, Monaco leh Leicester City ten Champions League quarterfinal an lut a, Diego Simeone chuan an hmachhawn tur team-ah an buai loh thu a sawi. Argentine manager chuan, "Kartawpah Sevilla nen La Liga match kan khel dawn a, quarterfinal-a kan hmachhawn tur kan la ngaihtuah hman rih lo," a ti.

Simeone chuan sawi chhun­zawmin, "Quarterfinal kan luh avangin ka lawm a, mah se hei hi chu step khat chauh a la ni rih. Champions League hi chu a danglam bik a, club tan season li ngawt a zawna quarterfinal luh hi a ṭha a ni. An theihtawp chhuahtu club neitu leh player-ten fak an phu a ni," tiin season li chhung a zawna quarterfinal an lut chu ama thawhrah bik a nih loh thu a sawi.

Mi thar Korkut

Bayer hi manager thar Tay­fun Korkut hoa khel an ni a, Roger Schmidt ban a nih hnuah Hannover leh Kaiserslautern boss ho hian match hnih khelin an khingpui an inhnehtawkpui ve ve. Atletico khelmuala an khelh danah pawh Korkut hi inthlahrung tur a ni lo - Champions League chanchinah first leg-a anmahni muala tlawm team vawi hnih chiah an la 'comeback' a, kum 2002 hnuah German club hian Champions League match 31 khelin khualmualah goal thum chiah an la khung!

Bayer Leverkusen coach Tayfun Korkut chuan, "Atletico leh Oblak ka lawmpui a, an goalkeeper khan goal a chhuah duh tlat lo a ni. Kan ṭhat dan berin kan khel chhuak lo a, mah se chuti chung chuan chance tam kan nei thei a, goal erawh kan khung thei miau si lo. Ka lawmna ber erawh a dik zawngin kan kal hi a ni a, kan chhunzawm zel a ṭul ang," tiin chak loh a pawm thiam hle.