Gotze-a tan season a tawp

Borussia Dortmund midfielder Mario Gotze chu dam lohna avangin season tawp thleng a inlan thei tawh dawn lo. Kum 2014 World Cup nomawi Germany-in an chawi theihna tura goal a khung avanga khawvel hriat hlawh Gotze natna hi 'metabolic disorder' tih a ni a, he natna hi taksain thil ei a pai ṭawih theih loh vanga thleng ṭhin niin taksa a ti chau a, mihring taksain a hnathawh tur ang a thawh theih loh phah ṭhin a ni.

Kum 24-a upa mid­fielder hian nikum nipui lai khan Bayern Munich aṭangin Dort­mund hi a zawm a, tihrawl hliam vanga a buai bawk avang­in tun season-ah league match kua chiah inkhel bul a la ṭan a ni. Dortmund chuan Gotze hi enkawl mek a nih thu leh beisei anga thil a kal tluan chuan nipui hunah chuan training a zawm leh theih tawh an beisei thu an sawi.

Borussia Dortmund chief executive officer Hans-Joachim Watzke chuan, "BVB chuan Mario Gotze hi a dam thuai theih nan duhsakna kan hlan a, kan fans maktaduai 10 chuangte aiawh pawhin duhsakna ka hlan nghal a ni," a ti a, Dortmund chuan, "Gotze hi fit taka a lo kir leh theih nan kan pui dawn a, season thar ṭan hmaa khel turin kan pui dawn a ni," tiin thuchhuah an siam bawk.