Chhinga Veng-in Luangmual an sawp

NECS Cup 2017 hmawr bawk a hnai a, nimin Lammuala in­khelah Chhinga Veng chuan 7-1 a Luangmual sawpin last 16 an paltlang. Inkhel hnuhnung zawkah Electric Veng chuan hun pangngaia goal a luh loh hnuah Zemabawk North chu penalty shooto­ut-ah 5-4 in an hneh ve bawk.

Chhinga Veng hian an match hmasa berah Lungverh chu 13-0 in an lo sawp tawh a, he mi ṭum hian Vanlalawma'n goal ruk a khung. Vanlalalawma hian Lungmual lakah goal khat khung belhin man of the match atan thlan a ni a, tun inelnaah goal sarih a khung tawh.

Kumin NECS Cup-ah hian Thingsulthiah, Ramhlun North, Ramhlun South, Armed Veng South, Chhinga Veng leh Electric Veng ten quarterfinal an lut tawh a, hmunruak la awm pahnih chu vawiin hian hnawhkhah a ni ang.

Last 16 tawp ni

Vawiin hian NECS Cup 2017 last 16 khelh zawh a ni ang. Chaw­hma dar 11:00-ah Chawnpui leh Bawngkawn an inhmachhawn dawn. Chawnpui hian Chaltlang leh Keifang si thum fai ve vein an hneh a, an khingpui tur Melthum an inlan loh bawk avangin tun inelnaah hian goal an la chuah lo.

Chawhnu dar 1:00-ah Sihphir Venghlun leh Bawngkawn ten quarterfinal hmun ruak hnuhnung ber an inchuh leh ang. Sihphir hian Aizawl khawpui pawn aṭanga CYMA football champion thei awm chhun Lengpui 2-0 in an hneh theih bakah Mission Vengthlang 2-3 in an pet chhuak bawk.

Chawnpui leh Sihphir Venghlun ṭantute chu K. Kawla Stand-ah ṭhut tur a ni a, Bawngkawn leh Be­thle­hem Vengthlang ṭantute chu Zo­muan­thanga Stand-ah an ṭhu thung ang.

Nimin Inkhel Results
Luangmual 1 - 7 Chhinga Veng
LUA : Lalruatkima 80'
CHI : Rochharzela 6'(P), 43'; Paul Ramfangzauva 20'; Vanlallawma 27'; Lalthlamuana 72'; Lalsawmzela 75'; F. Lalnuntluanga 88'
MoM : Vanlallawma, Chhinga Veng
Zemabawk North 0 - 0 Electric Veng
Penalty shootout-ah Electric Veng hi 5-4 in an chak
MoM : Lalengzauva Chenhrang, Electric Veng
Vawiin Inkhel Tur
11:00 AM Chawnpui Vs Bawngkawn
01:00 PM Sihphur Venghlun Vs Bethlehem