Atalanta lakah Juventus an vannei Ronaldo-a'n penalty vawi hnih a khung

Juventus chuan an mikhual Atalanta lakah vawi hnih goal an phurh hnuin point an sual chhuak hram. Cristiano Ronaldo chuan penalty ṭum hnih chhuih lutin 2-2 in an inhnehtawk.

Inrinni zan inkhel dangah pahnihna Lazio chu Sassuolo lakah 2-1 in an tlawm a, champion lai Juventus chuan point riata hma hruai falin a zawna a vawi kua nan an champion ngei a rinawm. Zanin dar 1:15 hian pathumna Inter Milan chuan Torino an mikhual ang. 

Barcelona nena inremna nei tawh Miralem Pjanic chu bench lamah hun hmantir a ni a, a aiawh turin kumina inlan tam lo Sami Khedira dah a ni thung. Mattia De Sciglio leh Merih Demiral te hliam vangin an chawlh a ngai, forward Paulo Dybala leh defender Matthijs de Ligt te erawh hremna hmang zoin inkhel bul an ṭan.

Atalanta defender pawimawh Jose Luis Palomino pawhin hremna a hmang zo tawh a, hmun lailum a chang lehnghal. Papu Gomez, Josip Ilicic leh Duvan Zapata te tlarhma lamah an inkawp thei, midfielder Robin Gosens erawh inbuatsaihna lamah a in hliam avangin Timothy Castagne tan hmun a awm thung.

Allianz Stadium-a inkhel an ni a, team pahnih player thlir chuan harsa lutuk loin Old Lady lamin hnehna an chan mai a rinawm. Mahse, football chu team thawhhona hmanga khelh tur a nihzia Atalanta lamin huaisen takin an lantir.

Atalanta midfielder Papu Gomez-a'n box pawnah mawi taka ball a vir pui hnuin Duvan Zapata tan a lir lut; Zapata hi Rodrigo Bentancur venna lak aṭanga tal putin kawh zetin goal hmahruai a khung. Juve tan Dybala chuan keeper Pierluigi Gollini chu vawi hnih a rum ṭhaih zui ve bawk.

Argentine forward Dybala a hmuhnawm zui a, a ball pet chuan Marten de Roon kutah fuhin penalty an chawi - Ronaldo tan khung turin harsatna a awm lo. Ven loha  awm Atalanta midfielder Ruslan Malinovskiy chuan duhtawka a insiamrem hnuah an goal hnihna khung lehin 2-1 in hma an hruai nawn.

Juventus lamin hun ṭha nei zui mah se an vannei lo, Dybala cross chu hnai tak aṭangin Ronaldo-a'n goal zawnah a tauh thei lo. Hun tawp hma deuhin forward Luis Muriel chuan handball vang bawka a penalty chawi chu Ronaldo chuan si phurh sut zawh nan a hmang.

Serie A season kal laia goal khung hnem ber Atalanta (87 goals) lakah goal hnih an phurh hnuin an sut thei hram a, point khat hlu tak an hlawh chhuak - an elpui Lazio an tlawm avangin Maurizio Sarri naute tan an point hmuh hi a hlu zual.

Sarri chuan, "Europe-a team ṭha zinga mi kan hmachhawn a ni a, harsa takin point kan hlawh chhuak. Second half kan khelh danah ka lawm, a tir lamah erawh kan buai tih chu phat rual a ni lo," a ti. Khelh hmabak aṭangin point hmuh theih 18 a la awm avangin nomawi sawi a la hun loh thu a sawi tel bawk.

Atalanta coach Gian Piero Gasperini chuan, "Point thum hmuh phu khawpin kan khel chhuak, football-ah chuan chak turin a chang chuan khelh ṭhat ringawt hi a tawk zo ṭhin si lo," a ti. Atalanta hian Champions League quarterfinal lut tawhin Serie A-ah pathumna an ni mek - tih fuh palh ngawt chu a ni tawh lo ang.