Champion lai BCA an la ṭha reng
Mizoram Super League Season 7-ah champion lai Zarkawt BCA-in an match hmasa berah anmahni el tawk tur bera ngaih Khatla TBL chu 96-79 in an hneh a, R. Dengṭhuama Hall-ah basketball hmuhnawm an pho chhuak. BCA hian June 7, Thawhlehni hian match hnih chak zawn tawh Mission Veng Hotshots an hmachhawn ang a, Khatla TBL-in June 8, Nilaini zanah Mizo hlanga khel Chawnpui BC an hmachhawn thung ang.
Champion zia
Zarkawt BCA-in Miami aṭangin Joseph Fredrick Allen an chat lut tawh a, state pawn player Sowkin Shetty leh Aaron Varghese Blessen te la chah lut lo mah se champion nawn turin an ṭha tawk tih an pholang. Champion lai tan Lalrina Renthlei, Zonunsanga leh Matthew Remtluanga Sailo te an la ṭha reng a, beiseina sang tak nena thlir Lalhnehpuia Chhakchhuak erawh a ruh a la no deuh.
Allen hian hmuhnawm keng tel tam lo mah se team tan a ṭangkai a, feet ruk leh inches riata sang a nih bakah a sa a ṭhat avangin ring hnuaiah a ṭangkai - point 33 zet a nei. Lalrina'n a ṭhat dan bera a la khel lo chungin 26 points a nei a, Allen nen 'alley-oop' tum ball vawrh chho chu ring-ah a lut zawk - fuh chiah se chuan mipui an ding suau ang.
Ramthar tlangval Zonuna'n a thluak ṭhatzia a pholang a, court pawna awm TBL player a vawm per chu mipuiin an lawm. BCA guard hi a chhehvelah buai loin game-ah pawh a ṭangkai a, Matthew pawhin block ṭum thum neiin team innghahna a la ni reng.
Sangkima leh Hnehpuia te squad tichaktu an ni a, Zarkawt tlangval pahnih hian theihna an nei sang. Hnehpuia'n hun tawp dawn hnaiah mawi zetin 3 points a lut a, NBA Academy-a awm tawh leh United States-a college basketball khel tawh a nih miau avangin court chhungah a theihna tam zawk a lantir a ṭul reng a ni.
Levi a hmuhnawm
Hun tawpa Khatla TBL leh BCA inthlauhna hi point 17 a ni a, inkhelah erawh hei ai hian an inhnaih zawk. TBL-in foreigner an la ṭha a, Levi Bradley Jr chu player hmuhnawm bik 'R. Dengṭhuama Stadium' pan chhan tlak baller a ni.
Levi hian point 29 a nei satliah lo a, Matthew-a 'dunk' khumin mipui a dintir a, 'big screen' a an replay hnuah pawh mipui an la au thei hial. Khatla TBL-in match hmasa berah hnehna chang lo mah se champion thei tur player an nei a, BCA laka an tlawm chhanah point guard an neih ṭhat tawk loh vangah a puh theih.
MSL-a rinrawl ni turin Vaivakawn rawlthar Nicholas Lalmuanpuia'n tawnhriat neih belh a mamawh a, TBL ṭantuten India camp-a awm mek Bungkawn tlangval Vanlalṭhazuala rawn let hun an nghakhlel khawp ang. Chutihrualin Mission Veng tlangval K. Lalthianghlima'n theihna a nei sang tih a lantir a, a lantir khat avangin chakpui tham a tling lo. Zotlang tlangval Vanlalrinchhana erawh a rintlak hle.
TBL leh BCA te an inhmachhawn hma hret a, play in (semifinal) emaw finals emawah an inhmachhawn leh ngei a rinawm. Chumi hunah chuan team pahnih hi an insiamrem tawh ang a, a hmuhnawm lehzual ang.