TKS aia 'hot' zawk MSV

Mizoram Super League Season 7-ah Mission Veng Hotshots leh Tuikual South ten an match hmasa berah hnehna an chang ve ve a, Inrinni zan khan team pahnih hi an intawng. R. Dengṭhuama Hall-ah Hotshots-in 80-69 in TKS an hneh.

Hotshots-in match hnihnaah Joshua Aaron Keyes an chhawr thei a, Cleveland Ohio aṭanga an lakluh Aaron Keyes hian a match hmasa berah point 21 a nei nghal.

Mission Veng coach David Lalruatfela chuan,"Aaron Keyes khan vawi khat a practice a, chumi ṭum ai chuan a ṭha tawh zawk. Chutihrualin ngai a la awh bik lo a, time zone inang lo avangin mut hun thlengin harsatna an tawk. Hma a sawn zel ang," tiin an foreigner chungchang a sawi.

Aaron Keys-a'n Hotshots a chakpui a, Khatla TBL aṭanga an lakluh Eddie Zairemmawia (20 pts) leh Lalrozama (13 pts) te an che ṭha bawk.

Tuikual South foreigner Darrel Bowie pawhin hma a sawn a, point 24 nei mah se chakpui tham a tling lo. Match hmasa bera point 40 nei thei Lalnunpuia'n (R-a) point 22 a lut a, Dennis Lalmuanpuia'n point 14 thawh mah se Mizo player ṭha pahnih pawhin result an thlak pha lo.

TKS hi Hotshots lakah chak lo mah se champion thei lo tura dah ngawt a rem lo. A chhan chu Tuikual South hian squad-ah feet ruk leh inches 11-a sang Amritpal Singh an ziaklut a, India international player rawn thlen hunah chuan tawh an khirh khawp ang.