Carlos Tevez a chawl ta

Argentina striker ropui Carlos Tevez chuan inkhelh a chawlhsan thu a puang a, kum 38 mi striker hian June 2021-a Boca Juniors-a a contract a tihtawp hnuah khelmual a rap leh tawh lo.

South American footballer of the year-a ṭum thum ngawt thlan lo ni tawh Tevez chuan a chawlh chhan chu nikuma a pa thih vang a nih thu a sawi a, sawmna tam tak la dawng mah se inkhelh chhunzawm châkna a nei tawh lo tih a sawi bawk.

Tevez chuan, "Ka fan number 1 ka chân avangin inkhelh chhunzawm zel thei ka ni tawh lo a, tunah chuan ka chawl ve tawh dawn ta. Sawmna tam tak ka la dawng a, USA aṭang pawhin ka dawng.

"Mahse, ka career hi a tawp a hun tawh a, ka theihna zawng zawng ka hlan a ni. Ka pa a awm tawh loh avangin nikum khan inkhelhte kha harsa ka ti em em a ni," a ti.

Tevez-a pa Segundo Tevez chuan nikum khan Covid-19 a kai ve a, February 2021 khan kum 58 mi niin a thi. Tevez hian June 2021 khan amah siam liantu Boca Juniors a chhuahsan thu a puang a, Argentine club dang tana a khelh loh tur thu a sawi.

Hun rei tak chhung club nei loin a awm zui a, a tawpah a boot khai mai a thlang ta. Tevez hian Boca Juniors aṭanga a career a ṭan hnuah Brazilian club Corinthians, West Ham, Manchester United, Manchester City, Juventus leh Shanghai Shenhua tan a khel leh a, a hun tawp lamah Boca hi vawi hnih a zawm leh bawk.

Kum 2004 khan Argentina tan Olympic gold a hlawh chhuak a, ram tan hian match 76 khelin goal 13 a khung a, Boca tan league nomawi panga chawiin Copa Libertadores-ah a champion pui bawk a, South American football-a nomawi chawi theih chu a chawi kim.

Boca aṭangin kum 2005 khan Corinthians a pan a, Brazilian club hi league-a a champion pui hnuah rin loh takin West Ham a zawm a, 2006-07 season-a Hammers an relegate loh nan tha a thawhhlawk hle.

Kum 2007 khan Manchester United a pan a, match 99-ah goal 34 khung sakin, season hnih a chamah Premier League nomawi a chawi ve ve a, League Cup, FA Community Shield, Champions League leh FIFA Club World Cup-ah a champion pui bawk.

United tana Cristiano Ronaldo leh Wayne Rooney te nena an inkawp chu football khawvela inkawp hmuhnawm ber pawl an ni - kum 2009 khan khawthlang media sawi nghing dawt khawpin United a chhuahsan a, Manchester City a zawm!

City tan match 148-ah goal 73 khungin Premier League, FA Cup leh Community Shield-ah a champion pui a, kum 2013 khan Juventus a zawm zui. Italian club tan match 95-ah goal 50 khungin Serie A (2), Coppa Italia (1) leh Supercoppa Italiana (1) ah nomawi a chawipui.

Juve a chhuahsan hnuah Boca a zawm a, season khat Shanghai Shenhua tan khel leh zawkin, a hnuah Boca-ah bawk a kir a, Argentine club hi a hun tawp hman nan a hmang ta a ni.