Zverev a hliam na

Alexander Zverev chuan Rafael Nadal nen semifinal an khelh laiin hliam na tak a tuar a, inelna a hmachhawn zui thei lo. German tlangval hian a kerek dinglam a rap lek a, a chawlh chen tur erawh sawi theih a la ni lo.

Nadal leh Zverev an inkhel tawk hle, set khatnaah tie break khelh niin set hnihnaah pawh an inchai tawk 7-6 (10-8), 6-6 a nih lai tawkin Zverev hi a inhliam, a hliam a nat avangin mittui nen French Open a mangṭha.

Wheelchair hmangin nawr chhuah nghal a ni a, hun rei vak lo enkawl a nih hnuah tiang nen tennis court-ah a rawn kir leh a, umpire leh a khingpui Nadal a rawn thlah. June 27 aṭanga khelh tur Wimbledon chu a khel thei dawn lo.

Kum 25 mi Zverev chuan, "Endikna hmasa berah chuan hliam hi a na angreng a, a vawi hnih nan endik leh a ni dawn. Hmun hrang hrang aṭanga min tawrhpuina thu min thawntute chungah lawmthu ka sawi," a ti.

Zverev laka vannei Nadal-a'n final a lut zui a, nizan khan Casper Ruud nen nomawi an inchuh zui. Ruud hi Nadal-a tennis academy aṭanga inzir chhuak a ni, a naupan lai aṭanga a ngaihsan tak nen final an khelh result hi kan hre hman lo.

Nadal a chak a nih chuan Grand Slam nomawi 22-na a ni dawn, French Open atan bik title 14-na a ni ang. Ruud erawh tun hma lama Grand Slam final la khel ngai lo a ni thung.