Mizoram hmeichhe team an chak

Khelo India Youth Games 2022-ah Mizoram hmeichhe team chuan Inrinni khan an match hmasa khelin Odisha chu 2-0 in an hneh a, goal hnih hi Hnahthial tleirawl Lalrinmawii khung niin first half leh second half-ah a khung.

Vawiin chawhma dar 9:00 hian Mizoramin Panjab University ground-ah Haryana an hmachhawn dawn a, an khingpui tur Haryana hian 2-0 bawkin Gujarat an hneh. Mizo hmeichhe team hi SYS coach pahnih Lizzy Lalhmingsangi (coach) leh R. Lalnunsangi (manager) ten an hruai.

Mizoram coach Lizzy chuan, "Khua a lum a, 40C chunglam te a nih avangin a hautak hle. Inkhelh ṭan chiahah kan keeper hnar a thi a, chu chuan kan harsatna tawn a sawifiah.

"RG Stadium-a kan training-naah hard ground (lei) ah kan khelh avangin khelh a harsa a, kan theihna angin kan la khel chhuak lo," tiin Vanglaini a hrilh a, Haryana chu team ṭha an nih thu a sawi tel bawk.