Hammers laka chak lo Norwich an relegate

Premier League relegation battle a ngaihnawm chho a, Inrinni zan inkhelah West Ham-in Michail Antonio goal li hmangin Norwich City 4-0 in an sawp. Match 35 aṭanga point 21 chauh hmutu Canaries an relegate a, season liam taa nomawi an chawina Championship-ah bawk an kir dawn.

Tla thei zinga mi Watford pawhin Newcastle United 2-1 in an hneh a, West Ham nen point 34 hmuin Premier League khelh zel theihna kawng a inhawng zau sawt. Chutihrualin chhiarkawp dan hmang chuan AFC Bournemouth (28 pts) leh Aston Villa (27) tan lehpelh theih ve ve an la ni.

Norwich City-in Premier League-ah bul an ṭan chhe lo a, match hnihnaa Newcastle United an sawp ṭumin Teemu Pukki-a'n hattrick a siam. Hemi hnu hian Manchester City te an hneh chho a, amaherawhchu Norwich hi vawi 24 zet an chak lo a, English inelna sang bera inham tang tur khawpin an insiamrem thei lo.

Hammers nen pawh hian Canaries hi an mual Carrow Road-a khel ni mah se eng ruai an ni lo a, Pukki-a'n goal khung a harsat bakah an tlarhnung a phui lo. Tun hnaia insiamṭha chho West Ham tan Michail Antonio a vul a, English forward hian first half leh second half-ah goal hnih ve ve a khung.

Norwich boss Daniel Farke chuan, "Norwich ka zawmtirha ka hna hmasa chu player ṭha chher a, club lian zawk hnena hralh a ni. Kan tum kan ti hlawhtling a, James Maddison kan hralh thei. Season hnihnaah football game mawi nen Championship-ah nomawi kan chawi a, tun season-ah erawh duhthusam kan thlen nawntir thei ta lo," tiin a sawi.

Farke hian May 2017 khan Norwich hi a zawm a, Championship-a a season hmasa berah 14-na a nihpui a, season hnihnaah a champion pui nghal. Farke chuan, "Tum kan nei a, hun kal tawha kan tihsual te siam ṭhain infrastructure siam ṭhat nan sum kan hmang thei a. Chutihrualin Premier League khelh zel hi kan duh dan a ni a, amaherawhchu kan theih tak loah chuan inelna kan hmachhawn danah inchhirna tur kan nei lo," tiin a sawi.

Norwich boss Daniel Farke insawifiah ṭha viau mah se Canaries striker hlui Dion Dublin chuan theihtawp an chhuah tawk loah a ngai. Hetihlai hian tla thei dinhmuna ding Watford khelh dan erawh sawisel theih a ni lo, Troy Deeney hoin Newcastle United lakah point thum hlu tak an sual chhuak.

Deeney hian inelna ṭan hmain Covid-19 a hlauh avangin training  a zawm lawk lo a, sawiselna tawk deuh mah se khelmualah erawh Watford tan theihtawp a chhuah. Newcastle-in Dwight Gayle hmangin goal an khung hmasa a, Watford-in Deeney hmangin second half-ah an lehthal. Hornets goal hnih hi penalty aṭanga lut a ni a, an thawhrim rah an seng.

Manager Nigel Pearson chuan, "Troy hi pressure hnuaia khelh nuam ti chi a ni a, hun harsaa mawhphurhna la ngam a ni. Penalty pettu a ni a, kan captain-in pressure a beng dai hi kan tan vanneihna a ni. Chutihrualin kan la him lo a, theihtawp kan chhuah zui ang," tiin a sawi.