Mizoramin Kerala an sawp

Khelo India Youth Games 2022 chu June 4, Inrinni khan Panchkula, Haryana-ah ṭan a ni a, KIUG hi a vawi lina niin India ram hmun hrang hrang aṭangin infiammi 8,500 dawn an pungkhawm.

Nimin khan mipa football khelh ṭan a ni a, Mizoram team hian Kerala 5-0 in an sawp. Inkhelh ṭan hnu lawkah Saitual rawlthar V. Zothanpuia chuan goal hmahruai a khung a, second half-ah Laltlanzova, Augustine Lalrochana, T. Malsawmzuala leh Laldanmawia ten goal khat ṭheuh an khung belh.

Inelna hi kum 18 hnuai lam tan a ni a, Mizoram hi group A-ah Punjab, Goa leh Kerala te nen an awm ho. Group B-ah Meghalaya, West Bengal, Karnataka leh Haryana te awmin group khat aṭangin team hnihin semifinal an lut ang.

Mizoram hi champion lai an ni a, SYS coach pahnih R. Lalthawmmawia (coach) leh Lalbulliana (manager) ten team an ho. Nimin khan Goa leh Punjab an inkhel a, result kan hre hman lo. June 7, Thawhlehni tlai dar 4:00 hian Mizoramin Goa an hmachhawn leh ang.

Mizoram hian champion nawn ngei tumin January thla khan Saidan, Kolasib-ah kar thum training an nei a, Covid-19 vanga inelna sawn a nih avangin an chawl reng a, inelna neih hmain kar hnih training an nei leh a ni.

Mizoram coach Mamawia chuan, "Khua a lum khawp mai a, hmeichhe team pawhin an zo lo lek lek a ni - mipa tan pawh a harsa. State dang tan pawh a harsa ve tho a ni ang, tlai dar 2-a inkhelh tur pawh dar 4-ah an sawn. Hetiang boruak karah hian champion kan la inbeisei ve reng a, theihtawp kan chhuah zel ang," tiin Vanglaini a hrilh.