England an chak lo, Germany = Italy
Nations League-in ngaih-hlut hlawh tawk lo mah se UEFA hnuaia inelna pakhat a nih miau avangin hlamchhiah ngawt theih a ni lo. Inrinni zan khan Hungary chuan Budapest-ah England 1-0 in an hneh a, Gareth Southgate-a hote an mualpho.
Inkhel dangah Germany leh Italy te 1-1 in an inhnehtawk. Hansi Flick hnuaiah Germany-in hma sawn mah se ram ṭha Netherlands an draw hnua Azzurri nen an inhnehtawk avangin fak chiam theih an ni ta lo. European champion Italy hian World Cup an khelh phak loh bakah La Finalissima-ah Argentina lakah 3-0 in an mualpho tih hriat a ṭha bawk.
Dan fuh lo
Euro 2020-ah Hungary ṭantute mawi lo taka an au avangin UEFA-in inkhel entu nei thei lo turin a hrem. Hungary leh England inkhelh ṭum hian entu awm lo tur ni mah se UEFA danin naupang en a phal avangin entu 26,935 an pungkhawm.
Naupang inkhel entute hi an nu leh paten an hruai a, Puskas Arena-a inkhel entute hian England hi an 'boo' hial. England manager Gareth Southgate pawhin hrem an ni chunga inkhel entu an awm chu mak a tih thu a sawi.
Goal khat a tawk
Inkhela goal awm chhun hi minute 66-naah penalty aṭangin Dominik Szoboszlai-a'n a khung. England defender Reece James chuan box chhungah keeper back pass-in ball umzui tumtu Zsolt Nagy a dang a, Chelsea defender leh England ṭantute tan penalty hi hriatthiam a har khawp ang.
Chutihrualin Hungary hian Harry Maguire hoa inrem England tlarhnung hi vawi tam an tibuai a, András Schafer-a'n goal ruakah a khung lo bawk. Three Lions pawhin Harry Kane hmangin goal chance an nei tho a, Hungary keeper Péter Gulácsi a paltlang thei lo thung.
England manager Gareth Southgate chuan, "Kan pawm thiam a ngai, kan khel ṭha tawk lo. Draw erawh result awm tak a ni. Player-ten season rei tak an hmang a, khaw lum kha harsatna a tling pha a, thil thar kan enchhin bawk," tiin a sawi.
Three Lions tan hian Leicester left back James Justin leh West Ham forward Jarrod Bowen ten a vawi khat nan bul an ṭan.
Germany = Italy
Hansi Flick-a'n an mikhualna hmun Bologna-ah Bayern Munich player paruk a luhtir a, a player neih ṭhat a chhawrah a ngaih theih. Roberto Mancini erawhin team thar din tumin player a enchhin a, ram tana vawi khat khelhna Davide Frattesi leh ram tana la khel tam lo Matteo Politano leh Gianluca Scamacca te an tel.
Germany-in inkhel thununin nung takin inkhel ṭan mah se Serge Gnabry leh Leon Goretzka ten an chance ṭha an bawhpelh. Azzurri tan Scamacca-a'n goal ban hrulah a pet chhuak.
Second half-ah Italy an insiamrem a, an goal bawh a na hle. Kum 18 mi Wilfried Gnonto-a'n bench aṭanga lutin ṭha taka a khalh luh hnuah ṭha takin a cross a, Lorenzo Pellegrini-a'n minute 70-naah awlsam takin a khung. Mahse, Germany-in minute thum hnuah Joshua Kimmich hmangin siphurh an sut a, Bayern midfielder hian chakna goal a khung teuh leh viau bawk.
June 4, Inrinni
Hungary 1 - 0 England
HUN : Dominik Szoboszlai 66' (P)
Italy 1 - 1 Germany
ITA : Lorenzo Pellegrini 70'
GER : Joshua Kimmich 73'
June 7, Thawhlehni zan
Germany 12:15 AM England
Italy 12:15 AM Hungary