Netherlands-in Belgium an sawp
Nations League a ngaihnawm chho zel - Netherlands chuan team ṭha zawka ngaih Belgium chu khualmualah an lenchilh a, mikhual tlangnel zia chhuahin 4-1 ngawtin hnehna an chang.
Netherlands tan Memphis Depay chuan goal hnih a khung a, Steven Bergwijn leh Denzel Dumfries ten goal khat ve ve an khung bawk. Belgium tana Michy Batshuayi chhanletna chu mualpho zualpui khuhna chauh a ni.
Belgium an tlawm a ni satliah lo a, an striker chhuanvawr Romelu Lukaku chu hliam vangin lakchhuah a ngai tel - Chelsea striker hian minute 27 bak khelmualah hun a hmang hman lo.
LVG=10
Netherlands boss Louis van Gaal-a'n a vawi hnih nana Dutch team a enkawl hnuah match 10 a hmachhawn tawh a, tlawm a la nei miah lo - Netherlands fan-ten World Cup an mitthla ṭan a nih pawhin a awm lo hran lo ang.
Belgium khelmualah pawh Netherlands an tlangnel a, Manchester City defender Nathan Ake nena ball an inchuhna lama inhliam Lukaku lakchhuah a nih hnuah phei chuan Netherlands an hlauhawm lehzual.
Minute 40-naah Netherlands hian goal hmahruai an khung a, Tottenham Hotspur-a hmun chang tam tawk lo, Ajax nena sawizawm hlawh mek Bergwijn chuan 'star' ni turin theihna a la nei reng tih pholangin goal hmahruai hi a khung.
A hming Depay
Team thawkrim leh ṭha zawk Netherlands-in goal dang khung loin chawlhlawk hmang mahse, second half-ah an thawhrim rah an seng a, Memphis Depay chuan goal hnih a rawn khung.
Barcelona forward hian minute 51-na leh 65-naah a khung a, chak tur a chiang tawh. Dutch team-in 3-0 ngawta hma an hruai chungin an inthlahdah phah lo a, Inter Milan right back Denzel Dumfries chuan minute 61-naah a belhchhah.
Hun pek belh minute thumnaah Belgium hun a inher chhuak a, Chelsea aṭanga Besiktas-a loan-a khel mek Batshuayi chuan si phurh a sut ṭhen. Mahse, Belgium tan harh tharna thlen turin a tlai hret tawh a, 4-1 in an mualpho.
Belgium vanduaina
Netherlands-in 4-1 ngawtin hnehna an chang a, hetihrual hian Belgium vanduaina thlir kan a rem bik lo - European team ṭha ber pawl hian goal khat chauh khung mah se an vanneih zan ni se a aia tam zawk khung thei an ni.
Leicester City fullback Timothy Castagne chuan team pahnihin goal an khung hma hian bar a tih per a, a goal khung chu video assistant referee hmanga ennawn a nih hnuah Batshuayi a lo offside avangin pawm a ni lo bawk.
Bench aṭanga luhtir Dries Mertens chuan woodwork a tih per bawk a, mahse, Belgium vanduai zan leh Netherlands khelh ṭhat zan a innang a, Roberto Martinez-a team-te an mualpho.
Netherlands beiseina
World Cup 2018-ah Netherlands an inlan phak lo a, Euro 2020 round of 16-ah an tla bawk - LVG hnuaiah Netherlands-in insiamṭha hna an thawk a, Nations League-a an bul ṭan dan hian beiseina sang tak a siam ang.
Netherlands tana bul ṭan thlir ila, tlarhmaah Depay leh Bergwijn an inkawp thei a, midfield-ah Barcelona midfielder Frenkie de Jong, Ajax midfielder Steven Berghuis leh Davy Klaassen te an inkawp thei.
Tlarhnungah Virgil van Dijk a ding vung a, Ake leh Ajax defender Jurrien Timber ten an dinpui a, Inter right back Dumfries leh tawnhriat nei ṭha Daley Blind an awm bawk - bench-ah Juve centre back Matthijs de Ligt, Club Brugge winger Noa Lang leh Atalanta midfielder Teun Koopmeiners te an la dah thei cheu!
League A Results
June 3, Zirtawpni Zan
Croatia 0 - 3 Austria
Austria: Marko Arnautovic 41'; Michael Gregoritsch 54'; Marcel Sabitzer 57'
France 1 - 2 Denmark
FRA: Karim Benzema 51'
DEN: Andreas Cornelius 68', 88'
Belgium 1 - 4 Netherlands
BEL: Michy Batshuayi 90+3'
NET: Steven Bergwijn 40'; Memphis Depay 51', 65'; Denzel Dumfries 61'