Farke-a'n Gladbach a enkawl dawn

Season hman zawh taka Norwich City-in an ban Daniel Farke-a'n duhtu a haihchham lo a, German coach hian Borussia Mönchengladbach chu kum thum chhung enkawl turin a zawm.

Kum 45 mi Farke hian Carrow Road-ah kum li hun a hmang hman a, hetih chhung hian Premier League-ah vawi hnih ngawt a inhlankaipui.

Mahse, November thla khan Norwich chuan a hna aṭang hian an chawlhtir a, January 2022 khan Russian Premier League club Krasnodar a zawm - June, 2024 thleng atan contract a ziak.

Farke hian Russian club-ah hun erawh a hmang rei lo. Russia-in Ukraine a run avangin match khat pawh a kaihhruai hmain a coaching staff-te nen Krasnodar hi an chhuahsan a, tunah chuan Bundesliga club a enkawl dawn ta.

Gladbach sporting director Roland Virkus chuan, "Club kan nihna anga ka hmachhawpte nen Daniel Farke hi a inrem thlap a ni. Kan hmaa chona inchhawpte Farke hoa hmachhawn turin kan inpeih tawh a ni," a ti.

Farke hian Lippstadt aṭangin a coaching career a ṭan a, German sixth division club hi kum ruk chhungin fourth division a hruai thleng thei a, a hnuah Borussia Dortmund II a enkawl zui.

Dortmund reserve team-ah kum hnih hun a hman hnuin contract chungchangah an inrem thei lo a, Norwich a pan zui a ni - tunah chuan a pianna ram ngeiah a kir leh ta.

Farke hi Norwich leh Krasnodar-a a assistant Christopher John leh Edmund Riemer ten an zui a, Adi Hütter a thlak - kum 52 mi Hütter Gladbach hi season khat chauh a enkawl hman a, Bundesliga-ah 10-na nihpuiin kum 10 chhunga league season an khar chhiat ber ṭum a ni.