Brazil-in Neymar 'magic' an mamawh lo - Tite

Brazil manager Tite chuan chak turin Neymar 'magic' an mamawh loh thu a sawi. Selecao hian Olympic hnuhnung pahnihah gold medal an la a, FIFA World Cup-ah erawh kum 2002 hnuah an la champion leh lo.

Tite chuan, "Brazil team hi hun rei tak ka enkawl tawh a, thutlukna tihsual ka ngah rualin tih ṭhat pawh ka nei. Chanchin lawmawm kan neih chu player thar ṭha an rawn chhuak a, tunah chuan tlarhmaah player pakhatah kan innghat tawh lo," tiin Neymar ringawtah an innghah loh thu a sawi.

Brazil hian nikum khan Tokyo-ah gold medal an la a, Olympian zinga mi Richarlison leh Bruno Guimaraes ten Tite hnuaiah dinhmun an chang chho ṭan. Selecao hian June 2 khan Son Heung-min telna South Korea chu 5-1 in an sawp a; Neymar-a'n penalty aṭanga goal hnih a khung bakah Richarlison, Phillipe Coutinho leh Gabriel Jesus ten an khung.

Tite hote hian tukin zing khan Japan an an hmachhawn a, June 11-ah Argentina nen an inkhel leh ang.