Sadio Mane-a'n fiamthu a thawh!

Liverpool forward Sadio Mane chuan Merseyside club a chhuahsan tur thu a sawi chu fiamthu a nih thu a sawi a, Senegalese forward hma hun hi a chiang lo tulh tulh.

Mane hi Africa Cup of Nations qualifier khelin a feh chhuak a, 3-1 a Benin an hneh hmain, "Midang ang thoin social media-ah ka awm ve a, comment pawh ka lo hmu ve ṭhin.

"Senegalese zinga 60-70% velin Liverpool chhuahsan turin min duh niin ka hmu a, an duh ang chuan ka ti ang," tiin a sawi a, sawi zui a hlawh hle.

Khawthlang media-ten Mane kalna tur an inrinsiak zui laih laih a, hetihlai hian Mane erawhin Senegal tan Benin an hnehna inkhelah hattrick a lo siam - a goal khung zinga pahnih chu penalty aṭanga a chhuih luh a ni a, Senegal tan match 90-ah goal 32 khungin match 99-a goal 29 khungtu Henri Camara a khum.

Benin an hneh zawhah Mane hi a hma hun chungchang zawh zui a ni a, Bayern Munich nena sawizawm hlawh mek forward chuan, "Nimin lama zawhna min zawh khan fiamthu zauh chungin chhanna ka lo pe a, kha tah khan ka duhtawk ang.

"Liverpool hi ka zah em em a, he club ka zawm tirh aṭang khan fan-ten anmahni zinga mi ang maiin min en a ni - ka hma hun chu nakinah kan la sawi ang chu," a ti.

AFCON 2023 qualifier inkhel ngaihven hlawh dangah Algeria chuan 2-0 in Uganda an hneh a, Aissa Mandi leh Youcef Belaili te chuan Algeria tan goal khat ve ve an khung.

Ivory Coast-in an thlen tur AFCON 2023 khel tur zawnnaah hian team 52 an tel a, preliminary round khelh a nih hnuah group stage inelna kalpui mek a ni - group 12-ah team pali zel awmin ṭhen an ni a, group tina a sang pahnihin AFCON an khel ang.

Hetihlai hian FIFA hremna tawk mek Zimbabwe leh Kenya chu a tirah group-ah dah ve ni mah se, qualifier hmaa FIFA hremna hlih hman a nih loh avangin qualifier an khel ve thei lo a, an awmna group-ah team pathum ve ve chiah an awm phah - heng group pahnihah (C & K) hian team pathum chauh inel dawn mah se a sang pahnih chu an tling tho dawn a ni.