Rangnick enkawl Austria an chak

Ralf Rangnick chuan Austria enkawl hna a thawk ṭan a, a match hmasa berah Croatia 3-0 in an luhchhuah. Manchester United manager hlui tan ram team a enkawlna hmasa bera a result hi duhthusam a ni ngei ang.

Zirtawpni zan Nations League inkhelah Austria tan Marko Arnautovic, Michael Gregoritsch leh Marcel Sabitzer ten goal khat ṭheuh an khung an mualneitu Croatia lamin a chhanletna tur an nei lo.

Austria hian World Cup an khel phak dawn lo, mahse manager thar kaihhruaina hnuaiah beiseina an nei - Nations League lamah pawh bul an ṭan fuh hle a, chhawmnun zel pawh an tum dawn.

Croatia hian a tirah Luka Modric chu bench lamah an dah, goal thum an chhuah hnuah Real Madrid midfielder hi dahluh a ni a, theihtawp chhuah mah se danglamna a siam thei ta bik lo.

Kum 63 mi Rangnick hian club hrang hrang 11 a enkawl tawh a, ram team erawh a enkawl vawi khatna a ni. Group A1-a an match dawt leh atan Thawhlehni zanah Denmark an mikhual ve leh thung ang.