Stoner-a'n Rossi a huphurh lo

MotoGP world champion Casey Stoner chuan a elpui Valentino Rossi a huphurh lo hle, bike intlansiakna sang ber hi chawlhsan hma se a zahawmna a humhim zawk a beisei thu a sawi hial.

Italian tlangval Rossi hi a vanglai chuan khawvela rider ṭha ber a ni. MotoGP huangah vawi sarih champion tawhin a chungnung thei hle, tunah erawh kum 41 mi a ni tawh a, world champion a nih hnuhnung ber pawh 2009 daih tawh kha a ni.

Spanish rider Marquez-a'n record ropui leh ṭha zawng zawng a rawn thaichhe chho zela ngaih a ni a, kum 27 mi chauh la ni chungin bike intlansiakna sang berah vawi ruk a champion der tawh–a chesual viau a nih loh chuan Rossi record ropui a khum dawn.

Marquez leh Rossi te an vanglai a inrual lo a, chutihrualin intlansiakna huang khatah an tlan dun hman miau avangin khaikhin an hlawh lo thei lo. Tun hnaiah chuan Honda rider Marquez a chungnung fal hle.

Honda bike khalhtu Marquez chuan, "Valentino hian theihna sang tak a nei a, a chungnung ber pawh a la ni thei ngei ang. Amaherawhchu tun hnaia a chet dan en chuan pathumna chin ni turin a tlan meuh lo.

"Mi ropui tak takte an chuai lam hmuh hi a nuam lo ṭhin, an hun hnuhnung lama midangin an hneh hi thil kalphung ni mah se chanchin hriat nuam a ni lem lo. Ka ngaihdan chuan Rossi pawh hi chawl hma se a mimal zahawmna a vawnghim zawk ang," a ti.

Rider ropui pahnih hi ṭawngkam bakah tlan kawng chhungah ngei a takin an inbei fo a, tun season lo awm turah pawh hian chanchin ngaihven hlawh an ni leh dawn. Rider inelna bakah Honda leh Yamaha inelna a ni tel bawk ang.